काठमाडौं । राष्ट्रिय स्वतन्त्र पार्टी (रास्वपा)की सचेतक क्रान्तिशिखा धितालले विपद्का बेला स्थानीय तह स्वतः सक्रिय नभएको भन्दै पूर्वाधार विकासमन्त्री सुनिल लम्सालले दिएको अभिव्यक्तिप्रति आपत्ति जनाएकी छन्।

सोमबार पूर्वाधार विकासमन्त्री लम्सालले विपद् आएपछि स्थानीय तह स्वतः क्रियाशील हुनुपर्नेमा त्यसो हुन नसकेको भन्दै त्यसबारे अनुसन्धान गर्नुपर्ने बताएका थिए।

मन्त्रीको उक्त अभिव्यक्तिको जवाफ दिँदै धितालले मंगलबार सामाजिक सञ्जालमार्फत काठमाडौंमा बसेर विपद् प्रभावित स्थानीय तह सक्रिय भएनन् वा समन्वय गरेनन् भनेर आरोप लगाउनु उचित नहुने बताएकी हुन्।

उनले विपद् प्रभावित स्थानीय तह आफैँ पनि विपद्को प्रत्यक्ष पीडित रहेको स्मरण गराएकी छन्।

‘अरे, हामीले कस्तो नसम्झेको ! स्थानीय तह आफैँ पनि यो विपद्को पीडित हो। उसको आफ्नै सहर बगर बनेको छ। आफैँ गाँस, बास, कपास गुमाएको छ। उसैबाट पूर्ण क्षमतामा सोच्न, निर्णय गर्न र अरूलाई सम्हाल्न अपेक्षा गर्नु कति न्यायोचित हो ?’ धितालले प्रश्न गरेकी छन्।

उनले विपद्का बेला स्थानीय तहलाई दोषारोपण गर्नुको सट्टा उनीहरूलाई आवश्यक स्रोत–साधन र सहयोग उपलब्ध गराएर उभिन सक्ने बनाउनु सबैको साझा जिम्मेवारी भएको बताएकी छन्।

धितालले संघ, प्रदेश र स्थानीय तहलाई एकअर्काका प्रतिस्पर्धीका रूपमा नभई संकटका बेला एकअर्काका सहारा बन्नुपर्ने धारणा राखेकी छन्।

‘स्थानीय तहलाई उभिन सक्ने बनाउनु सबैको जिम्मेवारी हो,’ उनले भनेकी छन्, ‘विपद्मा सरकारका तहहरू प्रतिस्पर्धी होइनन्, सहारा हुन्।’

उनको भनाइसँगै विपद् व्यवस्थापनमा संघ, प्रदेश र स्थानीय तहको भूमिका, अधिकार तथा स्रोत–साधनको अवस्थाबारे पुनः बहस सुरु भएको छ। विशेषगरी ठूलो विपद्का बेला आफ्नै संरचना र जनशक्ति प्रभावित भएको स्थानीय तहबाट तत्काल पूर्ण क्षमतामा उद्धार तथा राहतको अपेक्षा गर्नु व्यवहारिक हुन्छ कि हुँदैन भन्ने प्रश्न उठेको छ।

Originally published on abcnews.com.np.