महेन्द्रनगर । महाकाली नदीमा पानीको बहाव यो वर्षकै उच्च विन्दुमा पुगेको छ। नदीमा पानीको बहाव बढेपछि भारतसँग जोडिएको बनबासा पुलमा सवारी आवागमनसमेत प्रभावित भएको छ।

मंगलबार बिहान महाकाली नदीमा पानीको बहाव एक लाख १२ हजार क्युसेक रहेकोमा बेलुकी ६ बजे बढेर एक लाख ८७ हजार २३२ क्युसेकपुगेको थियो। राति ९ बजे गरिएको मापनमा भने बहाव केही घटेर एक लाख ८१ हजार क्युसेक कायम भएको जिल्ला प्रहरी कार्यालय कञ्चनपुरका प्रहरी नायब उपरीक्षक टेकबहादुर रावतले जानकारी दिए।

‘बेलुकी ६ बजे जलस्तर बढेर एक लाख ८७ हजार २३२ क्युसेक पुगेको थियो। अहिले एक लाख ८१ हजारमा झरेको छ,’ उनले भने।

पानीको बहाव अत्यधिक बढेपछि मंगलबार दिनभर बनबासा पुलमा चारपाङ्ग्रे सवारीसाधन सञ्चालन हुन सकेनन्।

महाकाली नदीमा पानीको बहाव एक लाख क्युसेकभन्दा माथि पुगेपछि भारतीय पक्षले बनबासा पुलमा ठूला सवारीसाधन सञ्चालनमा रोक लगाउने गरेको छ। करिब एक सय वर्ष पुरानो पुल जीर्ण अवस्थामा रहेकाले वर्षायाममा नदीको बहाव बढ्दा जोखिम हुने भन्दै भारतीय पक्षले ठूला सवारीसाधनमा रोक लगाउँदै आएको हो।

महाकाली नदीको जलस्तर सुदूरपश्चिमका पहाडी जिल्ला दार्चुला, बैतडी र डडेल्धुराका साथै भारतको उत्तराखण्डको माथिल्लो क्षेत्रमा हुने वर्षासँग प्रत्यक्ष रूपमा प्रभावित हुने गर्छ।

पछिल्लो समय ती क्षेत्रमा वर्षा भइरहेकाले महाकालीमा पानीको बहाव बढेको हो। नदीको जलस्तर थप बढ्न सक्ने सम्भावनालाई ध्यानमा राख्दै सीमावर्ती क्षेत्रका बासिन्दा तथा यात्रुलाई सतर्क रहन आग्रह गरिएको छ।

Originally published on abcnews.com.np.