काठमाडौं । प्रधानमन्त्री बालेन्द्र शाहले नेपालले भोग्दै आएको जलवायुजन्य विपद्को विषय अन्तर्राष्ट्रिय समुदायसमक्ष बलियो रूपमा उठाउनुपर्ने समय आएको बताएका छन् ।

सोमबार फेसबुकमार्फत विपद् व्यवस्थापनसम्बन्धी पछिल्लो अवस्थाबारे ब्रिफिङ सार्वजनिक गर्दै प्रधानमन्त्री शाहले हिमालय क्षेत्रमा जलवायु परिवर्तनका कारण जोखिम बढ्दै गएको बताएका हुन् ।

‘यस घटनाले हिमालय क्षेत्रमा जलवायु परिवर्तनसँगै हामीले खेप्नुपरेको जोखिम बढ्दै गएको संकेत गरेको छ । अन्तर्राष्ट्रिय समुदायसमक्ष जलवायु परिवर्तनका कारण भोग्नुपरेका विपद्को विषयबारे बलियो गरी उठान गर्नुपर्ने समय आएको छ,’ उनले भनेका छन् ।

प्रधानमन्त्री शाहले रसुवाको भोटेकोशी नदीमा आएको बाढीलाई हिमालय क्षेत्रकै ठूलो विपत्तिका रूपमा उल्लेख गरेका छन् । यस विपत्तिले जलवायु परिवर्तनका कारण हिमाली क्षेत्रमा बढ्दै गएको जोखिम र त्यसबाट नेपालले बेहोर्नुपरेको मानवीय तथा भौतिक क्षतिलाई पुनः अन्तर्राष्ट्रिय बहसको विषय बनाएको छ ।

नेपालले विश्वव्यापी हरितगृह ग्यास उत्सर्जनमा नगण्य योगदान गरे पनि जलवायु परिवर्तनका कारण हिमनदी पग्लिने, हिमतालको जोखिम बढ्ने तथा बाढी–पहिरोजस्ता विपद्को जोखिम बढ्दै गएको भन्दै लामो समयदेखि जलवायु न्यायको मुद्दा उठाउँदै आएको छ ।

भोटेकोशी बाढीपछि उद्धार, खोज तथा राहतसँगै अब पुनःस्थापनाको काम चुनौतीपूर्ण बनेको छ । सरकारले विपद् व्यवस्थापनमा पूर्वसूचना प्रणाली, जोखिमयुक्त बस्तीको पहिचान तथा सुरक्षित स्थानमा स्थानान्तरणलाई प्राथमिकतामा राख्ने नीति अघि सारेको छ ।

Originally published on abcnews.com.np.