काठमाडौं । सरकारले बाढी प्रभावित क्षेत्रको प्रारम्भिक पुनर्स्थापनाको काम २१ दिनभित्र अघि बढाउने भएको छ ।

प्रभावित नागरिकलाई सामान्य अवस्थामा फर्काउन पूर्वाधार विकास मन्त्रालयले कार्यदल गठन गरेको छ । कार्यदलले प्रभावित जिल्लामा आवश्यक कामको पहिचान, समन्वय र कार्यान्वयनमा सहजीकरण गर्दै २१ दिनभित्रै प्रारम्भिक पुनर्स्थापनाको काम अघि बढाउने मन्त्रालयले जनाएको छ ।

कार्यदलले प्रभावित क्षेत्रका सडक, पुल, खानेपानी, पुनर्वास, झोलुंगे पुल, भग्नावशेष व्यवस्थापन, सञ्चार र स्वास्थ्य लगायतका क्षेत्रमा आवश्यक कामको पहिचान गरी सम्बन्धित निकायसँग समन्वय गर्नेछ । सम्बन्धित सरोकारवाला निकाय तथा एजेन्सीलाई परिचालन गरी कामको नियमित अनुगमन तथा रिपोर्टिङसमेत गर्नेछ ।

त्यस्तै, विपद्बाट भएको क्षति तथा जोखिमको शीघ्र प्राविधिक र वस्तुगत मूल्यांकन गरी तत्काल सञ्चालन गर्नुपर्ने आपत्कालीन पुनर्स्थापना तथा सेवाको पहिचान गर्ने कार्यदलको जिम्मेवारी तोकिएको छ ।

प्रभावित क्षेत्र, संरचना तथा परिवारलाई जोखिम र प्राथमिकताका आधारमा वर्गीकरण गरी तत्कालीन, अल्पकालीन तथा दीर्घकालीन कार्ययोजना तयार गर्ने पनि कार्यदलको जिम्मेवारी हुनेछ ।

कार्यदलले पुनर्स्थापनाका लागि आवश्यक जनशक्ति, उपकरण, सामग्री तथा वित्तीय स्रोतको आवश्यकता निर्धारण गर्नेछ । संघ, प्रदेश, स्थानीय तह, सुरक्षा निकाय, निजी क्षेत्र तथा विकास साझेदारबीच समन्वय र सहजीकरण गर्ने कामसमेत कार्यदलले गर्नेछ ।

पुनर्निर्माणका क्रममा भूगर्भीय अवस्था, जलवायु परिवर्तन, बाढी, पहिरो तथा अन्य विपद् जोखिमलाई समेत ध्यानमा राखिने मन्त्रालयले जनाएको छ । दोहोरो लगानी, स्रोतको दुरुपयोग तथा एउटै प्रकृतिका काम दोहोरिन नदिन एकीकृत योजना तथा सूचना प्रणालीको प्रयोग गरिनेछ ।

कार्यदलले आवश्यक नीतिगत, कानुनी, प्रशासनिक तथा बजेटसम्बन्धी निर्णयका लागि सम्बन्धित निकाय तथा प्रधानमन्त्री तथा मन्त्रिपरिषद्को कार्यालयसमक्ष सिफारिस गर्नेछ । कार्यप्रगति, देखिएका समस्या र समाधानका उपायसहित नियमित प्रतिवेदनसमेत पेस गर्नेछ ।

यस्तै, कार्यदलले आफ्नो कार्यक्षेत्रभित्रका कामको अनुगमन, मूल्यांकन तथा गुणस्तर सुनिश्चित गर्नेछ । विपद् पुनर्स्थापनाका क्रममा प्राप्त अनुभव र तथ्यका आधारमा भविष्यमा हुने विपद्को जोखिम न्यूनीकरणका लागि आवश्यक नीतिगत सुझावसमेत दिने मन्त्रालयले जनाएको छ ।

कार्यदलले सम्बन्धित सबै निकायबीच समन्वय गर्दै प्रभावित क्षेत्रको शीघ्र पुनर्स्थापना तथा नागरिकलाई सामान्य जनजीवनमा फर्काउने कामलाई प्राथमिकताका साथ अघि बढाउनेछ ।

Originally published on abcnews.com.np.