काठमाडौं । भदौ १० गते रसुवाको भोटेकोसीमा आएको अप्रत्याशित बाढीमा काठमाडौं महानगरपालिकाभित्रका १६ जना नागरिक बेपत्ता भएको प्रारम्भिक विवरण प्राप्त भएको छ । बाढीमा एक जनाको घरसमेत बगेको छ ।

महानगरपालिकाका अनुसार वडा नं. १ का एक जना रसुवाको घट्टेखोलाबाट सम्पर्कविहीन छन् । वडा नं. ६ बाट दुई परिवारका पाँच जना, वडा नं. ३१ बाट चार जना, वडा नं. २९ बाट एक जना र वडा नं. २६ बाट पाँच जना बेपत्ता छन् ।

यस्तै, वडा नं. २३ की उमा श्रेष्ठको देवीघाटस्थित घर बाढीले बगाएको छ । काठमाडौं महानगरपालिकाको विपद् व्यवस्थापन हेल्प डेस्क तथा विपद् सूचना केन्द्रबाट विवरण संकलन गरिएको हो । महानगरपालिकाले राष्ट्रिय सभा गृहमा केन्द्र सञ्चालन गरी भोटेकोसी बाढीबाट प्रभावित महानगरवासीको संख्या, अवस्था, आवश्यकता र क्षतिको विवरण संकलन गरिरहेको छ । केन्द्रले प्रभावितलाई सहयोग गर्न इच्छुक महानगरवासी, कम्पनी, संस्था तथा निजी क्षेत्रलाई सहयोग उपलब्ध गराउन आवश्यक सहजीकरणसमेत गरिरहेको छ । नागरिकलाई सूचना दिने, आवश्यक समन्वय गर्ने तथा तत्काल सहयोग उपलब्ध गराउन सहजीकरण गर्ने काम केन्द्रबाट भइरहेको छ । काठमाडौंबाट रसुवा, गोसाइँकुण्डलगायत क्षेत्रमा आन्तरिक पर्यटन तथा तीर्थाटनका लागि समूह बनाएर जानेको संख्या धेरै रहेकाले अझै थप महानगरवासी सम्पर्कविहीन हुन सक्ने महानगरपालिकाको अनुमान छ । विशेषगरी ठमेल क्षेत्रबाट धेरै व्यक्ति गएको हुन सक्ने भन्दै खोजी भइरहेको विपद् व्यवस्थापन विभागका प्रमुख अनिरुद्र नेपालले जानकारी दिनुभयो । केन्द्रमा सम्पर्क गर्नेहरूले प्रभावित क्षेत्रमा लत्ताकपडा, खाद्यान्न, स्टेशनरी तथा अन्य जिन्सी सामग्री कसरी र कहाँ उपलब्ध गराउने भन्नेबारे जानकारी लिने गरेका छन् । त्यस्तै, परिवारका सदस्य सम्पर्कविहीन भएको, बालबालिकाको शिक्षाका लागि सहयोग आवश्यक भएको तथा काठमाडौं बाहिर जान सहयोग आवश्यक रहेको भन्दै समेत नागरिकले जिज्ञासा राख्ने गरेका छन् । केन्द्रमा एक जना जनप्रतिनिधि र दुई जना कर्मचारीले विवरण संकलन तथा समन्वय गरिरहेका छन् । बाढीजन्य विपद् तथा सहयोगसम्बन्धी जानकारीका लागि ०१–५३४०८८० मा सम्पर्क गर्न सकिनेछ । महानगरपालिकाको निःशुल्क कल सेन्टर १६६००१५५११ तथा मेट्रो एफएमका स्टेशन म्यानेजर केशवप्रसाद नेपालको ९८४१२५०७८० मा पनि जानकारी लिन वा दिन सकिनेछ । यस्तै, मानसिक स्वास्थ्य परामर्श तथा स्वास्थ्य सेवाका लागि ११८० मा सम्पर्क गर्न सकिने महानगरपालिकाले जनाएको छ ।

Originally published on abcnews.com.np.