गोरखा । रसुवा हुँदै आएको बाढीका कारण त्रिशूली नदीमा बगेका मानिसका शव तथा मानव शरीरका अंग गोरखाका विभिन्न स्थानमा फेला परेका छन्।

जिल्ला प्रहरी कार्यालय गोरखाका प्रहरी नायब उपरीक्षक राजकुमार श्रेष्ठका अनुसार बिहीबार दिउँसो १ बजेसम्म त्रिशूली नदी किनारका विभिन्न स्थानबाट ७२ वटा शव तथा मानव शरीरका अंग फेला परेका छन्।

फेला परेका शवमध्ये ५९ वटा व्यवस्थापन गरिएको, सात वटा प्रदेश अस्पताल गोरखामा राखिएको र पहिचान भएका चार वटा शव सम्बन्धित परिवारलाई जिम्मा लगाइएको प्रहरी नायब उपरीक्षक श्रेष्ठले जानकारी दिए।

त्रिशूली किनारमा खोज तथा संकलन तीव्र

बुधबार दिउँसोदेखि जिल्ला प्रहरी कार्यालय गोरखाको प्रहरी टोली, सशस्त्र प्रहरी, नेपाली सेना, स्थानीय बासिन्दा तथा जनप्रतिनिधिको टोली त्रिशूली नदी किनारमा परिचालन गरिएको छ।

गोरखाका प्रमुख जिल्ला अधिकारी तुलसीबहादुर श्रेष्ठका अनुसार टोलीले विशेषगरी गण्डकी गाउँपालिका र सहिद लखन गाउँपालिका क्षेत्रका नदी किनारमा शव तथा मानव अंग खोज्ने, सुरक्षित रूपमा संकलन गर्ने र व्यवस्थापन गर्ने काम गरिरहेको छ।

प्रहरीका अनुसार गण्डकी गाउँपालिका–८ को धवादीघाट, वडा नं. ६ को भूम्लिचोक, वडा नं. १ को बुट्टार, वडा नं. ४ को ठेउवाटार र वडा नं. ७ को ज्यामिरेघाट क्षेत्रमा शव फेला परेका छन्।

त्यस्तै सहिद लखन गाउँपालिका–४ को सिलिङटारस्थित त्रिशूली नदी किनारबाट पनि शव फेला परेको प्रहरीले जनाएको छ।

पहिचान र अनुसन्धानको काम जारी

घटनापछि सम्बन्धित प्रहरी युनिटबाट खटिएका टोलीले नदी किनारमा फेला परेका शव तथा मानव शरीरका अंगलाई सुरक्षित रूपमा संकलन गरिरहेका छन्।

संकलित शवको पहिचान गर्ने, सम्बन्धित परिवारसँग समन्वय गर्ने तथा घटनासँग सम्बन्धित थप विवरण संकलन र अनुसन्धान गर्ने कामसमेत भइरहेको जिल्ला प्रहरी कार्यालय गोरखाले जनाएको छ।

त्रिशूली नदीमा बाढीका कारण ठूलो मानवीय क्षति भएपछि नदीको तल्लो तटीय क्षेत्रमा समेत शव तथा मानव अंग भेटिने क्रम जारी रहेको छ।

Originally published on abcnews.com.np.