काठमाडौँ, भदौ १८ गते । रसुवाको भोटेकोशीमा आएको विनाशकारी बाढीका कारण बिहीबार बिहान १० बजेसम्म एक हजार २५२ जनाको शव फेला परेको छ। नेपाल प्रहरीले दिएको विवरणअनुसार रसुवामा १२७, नुवाकोटमा १७७, धादिङमा ६०, चितवनमा ३५५, गोरखामा ६९, तनहुँमा ३८, नवलपरासी पूर्वमा २१८ र नवलपरासी पश्चिममा १९० जनाको शव फेला परेको छ। भारतमा फेला परेको तथा नवलपरासी पश्चिममा बुझाइएको १८ शवसमेत गरी कुल शव संख्या एक हजार २५२ पुगेको हो। फेला परेका शवमध्ये ९५ वटा शव आफन्तलाई हस्तान्तरण गरिएको प्रहरीले जनाएको छ। पहिचानका लागि डीएनए नमुना सङ्कलनलगायत आवश्यक प्रक्रिया पूरा गरी हालसम्म २१३ महिला, ३१४ पुरुष र ३७० जनाको लिङ्ग नखुलेको गरी कुल ८९७ शव व्यवस्थापन गरिएको छ। प्रहरीले ती शवलाई सुरक्षित रूपमा माटोमुनि राखिएको जनाएको छ। यस्तै, पहिचान हुन नसकेका ९५९ शवको विवरण नेपाल प्रहरीको वेबसाइटमा समेत अपलोड गरिएको छ। बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनलगायतका कार्यका लागि हालसम्म सात हजार ९१२ प्रहरी कर्मचारी परिचालन गरिएको प्रहरीले जनाएको छ। बाढीमा बेपत्ता भएका चार हजार ८७५ जनाको खोजी कार्य जारी रहेको छ। विभिन्न जिल्लामा रहेका होल्डिङ सेन्टरमा तीन हजार १२६ जनालाई राखिएको प्रहरीले जनाएको छ। प्रहरीले बाढीको जोखिममा रहेका विभिन्न जिल्लाका घरपरिवारलाई सुरक्षित स्थानमा स्थानान्तरण गर्नुका साथै सम्बन्धित निकाय र स्थानीयवासीको समन्वय तथा सहयोगमा उद्धार र खोजी कार्य गरिरहेको छ। विभिन्न स्थानमा अवरुद्ध भएका सडक तथा बाटो खुलाउने कार्यसमेत जारी रहेको प्रहरीले जनाएको छ।

Originally published on abcnews.com.np.