काठमाडौं । वर्षासँगै देशका विभिन्न नदी तथा खोलामा पानीको बहाव बढ्ने र केही जिल्लामा आकस्मिक बाढीको जोखिम रहेको बाढी पूर्वानुमान महाशाखाले जनाएको छ । महाशाखाका अनुसार रसुवा र नुवाकोट हुँदै बहने भोटेकोसी, त्रिशूली तथा ससाना खोलामा बहाव उल्लेख्य बढ्ने सम्भावना छ । यी क्षेत्रमा आकस्मिक बाढीको उच्च जोखिम रहेको महाशाखाले जनाएको छ । महाशाखाले भदौ १० गते भोटेकोसीमा आएको बाढीपछि अहिले भोटेकोसी र त्रिशूली नदीको बहाव सतर्कता तहभन्दा तल रहे पनि उच्च सतर्कता अपनाउनुपर्ने जनाएको छ । आज ताप्लेजुङ, पाँचथर, तेह्रथुम, संखुवासभा, धनकुटा, भोजपुर, सोलुखुम्बु, ओखलढुंगा, खोटाङ, उदयपुर, दोलखा, रामेछाप, सिन्धुली, सिन्धुपाल्चोक, काभ्रेपलाञ्चोक, ललितपुर, भक्तपुर, काठमाडौं, धादिङ, मकवानपुर, चितवन, गोरखा, तनहुँ, लमजुङ, मनाङ, मुस्ताङ, म्याग्दी, कास्की, स्याङ्जा, पर्वत, डोल्पा, रुकुम पूर्व, रुकुम पश्चिम, सल्यान, जाजरकोट, सुर्खेत, दैलेख, कालीकोट, मुगु, हुम्ला, जुम्ला, अछाम, बझाङ, बाजुरा, डडेलधुरा, बैतडी, दार्चुला र कञ्चनपुर आसपासका साना नदी तथा खोलामा पनि बहाव बढ्ने पूर्वानुमान छ । यी जिल्लामा आकस्मिक बाढीको मध्यम जोखिम रहेको महाशाखाले जनाएको छ । त्यस्तै, सप्तकोसी, नारायणी, कर्णाली र महाकालीलगायत ठूला नदीमा पनि पानीको बहाव उल्लेख्य बढ्ने पूर्वानुमान गरिएको छ । महाशाखाले नदी तथा खोला आसपासका बासिन्दालाई सतर्क रहन र जोखिमयुक्त क्षेत्रमा आवश्यक सावधानी अपनाउन आग्रह गरेको छ ।

Originally published on abcnews.com.np.