मकवानपुर । बागमती प्रदेश सरकारले भोटेकोशी बाढीका कारण आमाबाबु गुमाएका बालबालिकाको अभिभावकीय जिम्मेवारी लिने भएको छ।

प्रदेश सरकारले रसुवा, नुवाकोट र धादिङका बाढी प्रभावित परिवारका आमाबाबु गुमाएका बालबालिकालाई आवासीय सुविधासहित कक्षा १२ सम्म निःशुल्क शिक्षा दिने निर्णय गरेको छ।

बिहीबार साँझ बसेको प्रदेश मन्त्रिपरिषद् बैठकले यस्तो निर्णय गरेको प्रदेश सरकारका प्रवक्ता एवं भौतिक पूर्वाधार विकासमन्त्री भरतबहादुर केसीले जानकारी दिए।

बैठकले प्रदेश विपद् व्यवस्थापन कोष परिचालन कार्यविधि संशोधन गर्ने निर्णयसमेत गरेको छ। संघीय कानुनका कारण जिल्ला विपद् व्यवस्थापन कोषमा पठाइएको राहत रकम खर्च गर्न झन्झटिलो भएको भन्दै अब जिल्ला तथा स्थानीय तहका विपद् व्यवस्थापन कोषमा समेत रकम पठाउने व्यवस्था गरिने मन्त्री केसीले बताए।

Originally published on abcnews.com.np.