काठमाडौं । थाइल्यान्डले नेपालका बाढीपीडितको सहयोगार्थ ७० लाख थाई भाट अर्थात् करिब ३ करोड २० लाख रुपैयाँ नगदसहित आपत्कालीन राहत सामग्री प्रदान गरेको छ ।

थाइल्यान्डका प्रधानमन्त्रीको कार्यालयमा शुक्रबार आयोजित कार्यक्रममा प्रधानमन्त्री अनुतिन चानविराकुलले नेपाली राजदूत धनबहादुर ओलीलाई उक्त सहयोग हस्तान्तरण गरेका हुन् ।

नेपाल सरकार तथा नेपाली जनताको तर्फबाट राजदूत ओलीले थाइल्यान्ड सरकार र थाइल्यान्डका जनतालाई समयमै प्रदान गरिएको मानवीय सहयोगप्रति हार्दिक कृतज्ञता व्यक्त गरे ।

उनले थाइल्यान्डको सहयोगले नेपाल र थाइल्यान्डबीचको लामो समयदेखिको मैत्रीपूर्ण सम्बन्ध, ऐक्यबद्धता र घनिष्ठ सम्बन्धलाई प्रतिबिम्बित गरेको बताए ।

थाइल्यान्ड सरकारले उपलब्ध गराएको नगद सहयोग नेपालको प्रधानमन्त्री दैवी प्रकोप राहत कोषमा जम्मा गरिनेछ । राहत सामग्री भने यथाशीघ्र नेपाल पठाउने तयारी भइरहेको बैंककस्थित नेपाली दूतावासले जनाएको छ ।

थाइल्यान्डका प्रधानमन्त्री अनुतिनले नेपालको आवश्यकताका आधारमा आगामी दिनमा समेत मानवीय सहयोग निरन्तर जारी राख्ने आश्वासन दिएका छन् ।

Originally published on abcnews.com.np.