काठमाडौं । नेकपा (एमाले) का अध्यक्ष केपी शर्मा ओलीले रसुवाका भोटेकोसी तथा त्रिशूली नदीका बाढीपीडितलाई पार्टीले सोझै राहत पुर्‍याउने बताएका छन् ।

पार्टी कार्यालयमा आयोजित राहत हस्तान्तरण कार्यक्रममा ओलीले एमालेको तर्फबाट १ करोड २० लाख रुपैयाँ बराबरको राहत वितरण गरिने जानकारी दिए । जिन्सी सामग्रीसमेत जोड्दा राहतको मूल्य अझ बढी हुने उनको अनुमान छ ।

सरकारी कोषमा राहत रकम जम्मा गर्दा राहत थुप्रिने अवस्था आउन सक्ने भन्दै ओलीले पार्टीले पीडितलाई नै प्राथमिकतामा राखेर राहत वितरण गर्ने बताए ।

“सरकारी कोषलाई राहत चाहिएको होइन । राहत पीडितलाई चाहिएको हो । पहिले पीडितलाई राहत पुर्‍याउँछौँ,” ओलीले भने, “सरकारी कोषमा दाखिल गर्ने अवस्था, हैसियत रह्यो भने त्यसपछि दाखिल गर्न सक्छौँ ।”

ओलीले विपद्को समयमा राजनीतिक लोकप्रियता हासिल गर्नुभन्दा पीडितलाई अधिकतम सेवा पुर्‍याउने काममा केन्द्रित हुनुपर्ने बताए ।

उनले एआईबाट सिर्जना गरिएका दृश्यचित्रमार्फत आफूलाई जनताको सेवकका रूपमा प्रस्तुत गर्न खोजिएको भन्दै त्यसप्रति समेत आपत्ति जनाए ।

“यतिबेला पपुलर हुन खोज्ने होइन । पीडितलाई अधिकतम सेवा कसरी गर्न सकिन्छ, यो काममा लाग्नुपर्ने,” ओलीले भने ।

उनले विपद्का बेला प्रचारभन्दा उद्धार, राहत र पीडितको तत्कालीन आवश्यकतालाई प्राथमिकता दिनुपर्नेमा जोड दिए।

Originally published on abcnews.com.np.