काठमाडौं । लगातारको वर्षासँगै आएको बाढी र पहिरोका कारण देशका विभिन्न स्थानमा मुख्य राजमार्ग तथा सडकखण्ड अवरुद्ध भएका छन्। नेपाल प्रहरीका अनुसार बागमती, गण्डकी, कर्णाली, लुम्बिनी र सुदूरपश्चिम प्रदेशका विभिन्न सडकमा यातायात पूर्ण तथा आंशिक रूपमा प्रभावित भएको छ।

बागमती प्रदेशमा काभ्रे, रसुवा, नुवाकोट र धादिङका सडक प्रभावित भएका छन्। रसुवाको उत्तरगया गाउँपालिका–५ खाल्टेमा पहिरो खसेपछि त्रिशूली–मेलुङ–स्याफ्रुबेँसी सडक पूर्ण रूपमा अवरुद्ध छ। नुवाकोटको टोखा–छहरे सडकमा पनि बाढी तथा पहिरोको जोखिमका कारण यातायात प्रभावित भएको छ।

धादिङको बेनीघाट रोराङ क्षेत्रमा पृथ्वी राजमार्गका विभिन्न स्थानमा पहिरोका कारण कतै सडक पूर्ण अवरुद्ध छ भने कतै एकतर्फी रूपमा सवारी सञ्चालन भइरहेको प्रहरीले जनाएको छ। काभ्रेका केही सडकमा भने सम्भावित बाढीको जोखिमका कारण निश्चित समय मात्रै सवारी सञ्चालन गरिएको छ।

गण्डकी प्रदेशको म्याग्दीमा पहिरोका कारण बेनी–जोमसोम सडकखण्ड पूर्ण रूपमा अवरुद्ध छ। कर्णालीको मुगुमा मुगु–गमगढी सडक पनि पहिरोका कारण बन्द रहेको छ।

लुम्बिनी प्रदेशमा रोल्पा र अर्घाखाँचीका विभिन्न सडक पहिरोका कारण प्रभावित भएका छन्। रोल्पाको घोराही–थवाङ शहीदमार्गका विभिन्न खण्ड तथा अर्घाखाँचीको सालझण्डी–ढोरपाटन सडक अवरुद्ध छन्।

यस्तै, सुदूरपश्चिमको बझाङमा पहिरोका कारण जयपृथ्वी राजमार्ग पूर्ण रूपमा अवरुद्ध भएको प्रहरीले जनाएको छ।

लगातार वर्षा भइरहेकाले पहिरो तथा बाढीको जोखिम रहेका सडकमा यात्रा गर्दा सावधानी अपनाउन र सडकको पछिल्लो अवस्थाबारे जानकारी लिएर मात्रै यात्रा गर्न प्रहरीले आग्रह गरेको छ।

Originally published on abcnews.com.np.