काठमाडौं । प्रधानमन्त्री वालेन्द्र शाहले मानव बेचबिखन तथा ओसारपसारमुक्त समाज निर्माणका लागि सङ्घ, प्रदेश र स्थानीय तहसहित सबै सरोकारवाला निकायबीच प्रभावकारी सहकार्य र समन्वय आवश्यक रहेको बताउनुभएको छ।

मानव बेचबिखनविरुद्धको २०औँ राष्ट्रिय दिवसका अवसरमा शुभकामना सन्देश जारी गर्दै प्रधानमन्त्री शाहले मानव बेचबिखनलाई मानव सभ्यताकै कलङ्क र विश्वभर फैलिरहेको संगठित अपराधका रूपमा चित्रण गर्नुभएको हो।

यस वर्ष ‘प्रविधिको सही प्रयोग र सजगताः मानव बेचबिखनरहित राष्ट्र निर्माणमा ऐक्यबद्धता’ भन्ने नाराका साथ राष्ट्रिय दिवस मनाइँदैछ।

प्रविधिको विकाससँगै बदलिँदै बेचबिखनको स्वरूप

प्रधानमन्त्री शाहले प्रविधिको तीव्र विकाससँगै मानव बेचबिखन तथा ओसारपसारको प्रवृत्ति, प्रकृति, स्वरूप र गन्तव्यसमेत परिवर्तन हुँदै गएकोबताउनुभएको छ।

प्रविधिको दुरुपयोगबाट सिर्जित नयाँ चुनौती सामना गर्न राज्यका परम्परागत संयन्त्र मात्र पर्याप्त नहुने भन्दै उहाँले रोकथाम, नियन्त्रण र पीडितको संरक्षणका लागि समन्वित प्रयास आवश्यक रहेको उल्लेख गर्नुभएको छ।

उहाँका अनुसार नेपाल सरकारले राष्ट्रिय तथा अन्तर्राष्ट्रिय प्रतिबद्धताअनुरूप मानव बेचबिखन तथा ओसारपसार नियन्त्रणका क्षेत्रमा नीतिगत र संस्थागत सुधार गर्दै आएको छ।

यसका लागि सङ्घ, प्रदेश र स्थानीय तहका सरकार तथा सम्बन्धित सरोकारवालाबीच समन्वय र सहकार्यमा विभिन्न पहल भइरहेको प्रधानमन्त्री शाहले बताउनुभएको छ।

पालेरमो प्रोटोकलअनुकूल कानुन संशोधनको तयारी

प्रधानमन्त्री शाहका अनुसार मानव बेचबिखन तथा ओसारपसार (नियन्त्रण) ऐन, २०६४ लाई पालेरमो प्रोटोकलअनुकूल बनाउने गरी संशोधन विधेयक संसदमा दर्ता गरिएको छ।

कानुन संशोधनबाट मानव बेचबिखन तथा ओसारपसारबाट पीडित व्यक्तिको मानव अधिकार संरक्षणका लागि अन्तर्राष्ट्रियस्तरमा राज्यहरूबीच सहयोग र समन्वय बढाउन सहज हुने अपेक्षा गरिएको उहाँले बताउनुभएको छ।

संघीय संरचनाअनुकूल विद्यमान कानुनी तथा संस्थागत संयन्त्रलाई पुनःव्यवस्थित गर्ने क्रममा मानव बेचबिखनविरुद्धको नीति जारी गरी कार्यान्वयनमा ल्याइएको पनि प्रधानमन्त्री शाहले उल्लेख गर्नुभएको छ।

सरकार एक्लैले सम्भव छैन

मानव बेचबिखनविरुद्धको अभियानलाई प्रभावकारी बनाउन सङ्घीय सरकारको प्रयास मात्र पर्याप्त नहुने प्रधानमन्त्री शाहको भनाइ छ।

उहाँले प्रदेश सरकार, स्थानीय तह, राष्ट्रिय तथा अन्तर्राष्ट्रिय गैरसरकारी संस्था, विकास साझेदार तथा अन्य सरोकारवाला निकायको सहकार्य अपरिहार्य रहेको बताउनुभएको छ।

“हाम्रो साझा पहल र संयुक्त प्रयासले मात्र मानव बेचबिखनमुक्त समाज बनाउन सम्भव हुनेछ,” प्रधानमन्त्री शाहले शुभकामना सन्देशमा उल्लेख गर्नुभएको छ।

साझा प्रतिबद्धताका लागि आग्रह

प्रधानमन्त्री शाहले मानव बेचबिखन तथा ओसारपसारविरुद्धको सरकारी अभियानमा निरन्तर सहयोग, समन्वय र सहकार्य गर्दै आएका सबैप्रति धन्यवाद व्यक्त गर्नुभएको छ।

उहाँले मानव बेचबिखनमुक्त समाज निर्माणका लागि सरकारको प्रतिबद्धतामा साथ दिन, सहयोग गर्न र अभियानप्रति ऐक्यबद्धता जनाउन सबैमा आग्रहसमेत गर्नुभएको छ।

मानव बेचबिखनको बदलिँदो स्वरूपसँगै प्रविधिको दुरुपयोग रोक्ने, कानुनी संयन्त्र बलियो बनाउने र पीडितको अधिकार सुनिश्चित गर्ने विषय अहिलेको अभियानका प्रमुख चुनौतीका रूपमा देखिएका छन्। प्रधानमन्त्री शाहको सन्देशले यी चुनौती सामना गर्न राज्यका तीनै तह र गैरसरकारी क्षेत्रबीच साझा प्रयासलाई केन्द्रमा राखेको छ।

Originally published on abcnews.com.np.