काठमाडौं । दार्चुलामा पहिरोपछि बढेको जोखिम हाल घटेको देखिएको छ। अपिहिमाल गाउँपालिका–१, भट्टारमा पहिरो खसेपछि प्रभावित बनेको चौलानी नदीको बहाव शनिबार सामान्य देखिएको प्रमुख जिल्ला अधिकारी (सीडीओ) वर्तराज पौडेलले जानकारी दिएका छन्।

शुक्रबार पहिरो खस्दा नदीको बहाव केही हदसम्म अवरुद्ध भएपछि तल्लो तटीय क्षेत्रमा जोखिम बढेको थियो। तर अहिले पानी आफ्नै गतिमा निकास भइरहेको र नदीको तल्लो क्षेत्रमा पानीको बहावमा ठूलो उतारचढाव नदेखिएको सीडीओ पौडेलले बताए।

उनका अनुसार पहिरो खस्ने क्रमसमेत रोकिएको छ र तत्काल थप जोखिम देखिएको छैन। नदी किनारमा केही गेग्य्रान थुप्रिए पनि त्यसको उल्लेखनीय असर नपरेको प्रशासनको भनाइ छ।

मानवीय तथा पशुचौपायामा क्षति नभएको सीडीओ पौडेलले बताए। जोखिममा रहेका आठ घरपरिवारलाई शुक्रबार नै माथिल्लो तथा सुरक्षित स्थानमा सारिएको छ। उनीहरूमध्ये केही आफन्तको घरमा बसेका छन् भने सम्बन्धित वडा कार्यालयले आवश्यक व्यवस्थापन गरिरहेको जनाइएको छ।

यद्यपि, पहिरोका कारण अपिहिमाल बेसक्याम्प जाने पैदलमार्ग अवरुद्ध भएको छ। उक्त क्षेत्रमा मोटरबाटो नपुगेकाले पैदलमार्गबाटै आवतजावत गर्नुपर्ने अवस्था रहेको पौडेलले बताए।

पहिरो खसेको स्थान सदरमुकाम खलंगाबाट करिब १६–१७ घण्टाको पैदल दूरीमा रहेको छ। पालिकाको केन्द्रसम्मसमेत सडक नपुगेको प्रशासनले जनाएको छ।

घटनास्थलमा प्रहरी पुगिसकेको छ भने स्थानीय अवस्था र जोखिमबारे निगरानी भइरहेको जनाइएको छ।

Originally published on abcnews.com.np.