रसुवा र नुवाकोट भएर बहने भोटेकोशी, त्रिशूली तथा आसपासका साना नदीमा बहाव बढ्ने सम्भावना रहेकाले यी दुई जिल्लामा आकस्मिक बाढीको उच्च जोखिम रहेको महाशाखाले जनाएको छ।

भदौ १० गते रसुवाको भोटेकोशीमा आएको बाढीपछि अहिले भोटेकोशी र त्रिशूलीको बहाव सतर्कता तहभन्दा तल रहे पनि उच्च सतर्कता अपनाउनुपर्ने महाशाखाको भनाइ छ।

यस्तै, कोशी, बागमती, गण्डकी, लुम्बिनी, कर्णाली र सुदूरपश्चिमका विभिन्न जिल्लामा बहने साना नदी तथा खोलामा बहाव बढ्ने सम्भावना छ। ती क्षेत्रमा आकस्मिक बाढीको मध्यम जोखिम रहेको महाशाखाले जनाएको छ।

यसैबीच सप्तकोशी, तमोर, अरुण, दूधकोशी, तामाकोशी, सुनकोशी, पश्चिम सेती र महाकालीलगायत ठूला नदीमा पनि बहाव उल्लेख्य बढ्न सक्ने पूर्वानुमान गरिएको छ।

महाशाखाका अनुसार आज बिहानको मापनमा कोशी, नारायणी, वाग्मती, कर्णाली, महाकाली तथा तिनका सहायक नदीसँगै कन्काई, कमला, बबई, पूर्वी राप्ती र पश्चिम राप्तीको बहाव भने सतर्कता तहभन्दा तल रहेको छ।