काठमाडौं, २० वैशाख । सिभिल बैंकले ग्राहकहरुको सुविधाका लागि ट्याब बैंकि सेवा सुरु गरेको छ । ‘घरमै बसी–बसी, बैंकिङ खुशी खुशी’ नाराका साथ सिभिल बैंकले ट्याब बैंकिङ सेवा सुरु गरेको हो ।

सिभिल ट्याब बैंकिङ सेवाअन्तर्गत घरमै बसेर पनि सिभिल बैंकमा खाता खोल्न सकिने बैंकको सीइओ गोविन्द गुरुङले बताउनुभयो । ‘घर, अफिस वा आफूले चाहेकै स्थानमा झन्झट रहित तरिकाले खाता खोल्न, चेक डिपोजिट गर्न र अन्य बैंकिङ सुविधान लिन सक्नुहुनेछ’ सीआइओ गुरुङले जानकारी दिनुभयो ।

नागरिकताको फोटोकपी, फोटो लगायतको झन्झट यो सेवा लिने ग्राहले व्यहोर्नु नपर्ने बैंकले जनाएको छ । आमनागरिकको बैंकसम्मको पहुँचलाई सहज गर्नका लागि बैंकले यो सेवा सुरु गरेको सिभिल बैंकका अध्यक्ष इ. इच्छाराज तामाङले बताउनुभयो ।

सो सेवाको औपचारिक सुरुवात गर्दै नेपाल राष्ट्र बैंकका डेपुटी गभर्नर शिवराज श्रेष्ठले बैंकिङ सेवा जनताको घरदैलोमा पु¥याउन सिभिल ट्याब बैंकिङले महत्वपूर्ण योगदान दिने बताउनुभयो ।

सिभिल ट्याब सेवा हाललाई १० शाखाबाट उपलव्ध गराइएको जनाएको छ । बैंकले आगामी जेठभित्रमा ७० बढी शाखा विस्तार गर्ने लक्ष्य राखेको छ । बैंकले ६० शाखाबाट सेवा दिइरहेको छ ।

सिभिल बैंकले हालसम्म ३६ अर्ब ९६ करोड निक्षेप परिचालन गरेको छ भने ३६ अर्ब २८ करोड कर्जा लगानी गरेको छ ।