काठमाडौँ, २४ वैशाख।  समानताका आधारमा नेपाल–भारतबीच कूटनीतिक सम्बन्ध अघि बढाउनुपर्नेमा विभिन्न दलका नेता तथा नागरिक समाजका अगुवाले जोड दिएका छन् ।

रिपोर्टर्स क्लबले आज यहाँ आयोजना गरेको अन्तक्र्रिया कार्यक्रममा उनीहरुले मुलुकको वैदेशिक नीतिमा सबै दल एक ठाउँमा उभिनुपर्ने सुझाव दिनुभयो ।

नागरिक समाजका अगुवा डा सुन्दरमणि दीक्षितले नेपाल र भारत दुवै देशमा यतिबेला दिगो सरकार रहेको उल्लेख गर्दै दुवै देशका प्रधानमन्त्री बलियो भएकाले अब मुलुकलाई फाइदा हुने दिशातर्फ नेपाल सरकार अघि बढ्नुपर्ने बताउनुभयो ।

भारतीय प्रधानमन्त्री नरेन्द्र मोदीको नेपाल भ्रमण अत्यन्तै महत्वपूर्ण हुनेछ, उहाँले भन्नुभयो, “भारतीय प्रधानमन्त्री मोदी आफँै पनि धार्मिक व्यक्ति हुनुहुन्छ, उहाँ नेपाल आउनुको मुख्य कारण नेपाल भूमि वैदिक धर्मका दृष्टिकोणले पुण्यभूमि हो ।”

नेकपा (माओवादी केन्द्र) का नेता अग्निप्रसाद सापकोटाले भारतीय प्रधानमन्त्री मोदीको नेपाल भ्रमणले विगतमा भएका सम्बन्धलाई थप सुदृढ गर्ने बताउँदै भ्रमणबाट नेपालले आफ्नो हितमा फाइदा लिनुपर्नेमा जोड दिनुभयो ।

उहाँले भन्नुभयो, “विगतमा नेपालका प्रधानमन्त्री दिल्ली जाने परम्परा थियो, अब भारतका प्रधानमन्त्री नेपाल आउन थाल्नुभएको छ, दुवै मुलुकका सरकार प्रमुखको भ्रमण दोहोरो हुन थालेको छ, यो सुखद पक्ष हो ।”

नेपाली काँग्रेसका नेता एनपी साउदले भारतीय प्रधानमन्त्री मोदीको दुई दिने नेपाल भ्रमणले नेपाल–भारत द्विपक्षीय सम्बन्धमा थप हार्दिकता आउने विश्वास व्यक्त गर्दै भ्रमण सफल बनाउनका लागि सरकारले यथेष्ट गृहकार्य गर्नुपर्ने र भ्रमणलाई उच्चतम् हितमा प्रयोग गर्नुपर्ने बताउनुभयो ।

उहाँले भन्नुभयो, “औपचारिक भ्रमण काठमाडौँबाट शुरु भएको भए त्यो स्वभाविक र राम्रो सन्देश हुने थियो, पछि जनकपुर, मुक्तिनाथको भ्रमण भएको भए राम्रो हुने थियो, किनकी केन्द्रीय सरकार त काठमाडौँमा छ, जे भए पनि उहाँको भ्रमणलाई हामीले सकारात्मकरुपमा लिनुपर्छ ।”

राष्ट्रिय जनता पार्टी नेपालका महासचिव एवं प्रदेश सांसद मनिष सुमनले दुवै देशबीच ऐतिहासिक र अटुट सम्बन्ध रहेको बताउँदै भारतीय प्रधानमन्त्री मोदीको भ्रमणलाई सम्पूर्ण नेपालीले सफल पार्नुपर्ने विचार व्यक्त गर्नुभयो ।

भ्रमणका बेला भारतीय प्रधानमन्त्री मोदीसँग व्यापार घाटा कम गर्न, रोजगारी वृद्धि र लगानीको विषयमा छलफल गर्न सरकारलाई सुझाउँदै उहाँले भन्नुभयो, “भारतसँग हाम्रो विशिष्ट सम्बन्ध छ, भारतलाई गाली गरेर बढी राष्ट्रवादी भइदैन, सियोदेखि ठूला उपभोग्य वस्तु भारतकै प्रयोग हुन्छ ।”