काठमाडौं, १८  जेठ ।  देशका विभिन्न ठाउँको मौसम बदली भएर केही ठाउँमा पानी परिरहेको छ । भारतको बिहारमा बनेको न्यूनचापीय रेखा र पश्चिमी वायुको प्रभावले देशभरीकै मौसम बदली भई केही ठाउँमा पानी परेको मौसमविद् मञ्जु बासीले जानकारी दिनुभयो ।

उहाँका अनुसार यसकै प्रभावले शुक्रबार एकैछिन मौसम खुलेपनि फेरि बदली भई केही ठाउँमा पानी पर्नेछ । तर झरिको संभावना भने कम छ । प्रि मनसुनी गतिविधि सक्रिय हुँदा यो महिना धेरै ठाउँमा औसतभन्दा बढी पानी परेको छ ।

पश्चिमी न्यूनचापीय प्रणालीको आवृत्ति बढी भएको र पूर्वी वायु सतही रुपमा बसेकाले यो महिना धेरै ठाउँमा औसतभन्दा बढी पानी परेको जल तथा मौसम पूर्वानुमान महाशाखाले जनाएको छ । महाशाखाका मौसमविद् सुवास रिमालका अनुसार गएको वैशाख १८ गतेदेखि हिजोसम्ममा सुर्खेतमा सबैभन्दा धेरै पानी परेको छ ।यसअघि चैत महिनामा पनि धेरै ठाउँमा औसतभन्दा धेरै पानी परेको थियो । यो वर्ष मनसुन याममा पनि औसत पानी पर्ने देखिएको उहाँले जानकारी दिनुभयो ।