काठमाडौ, २१ जेठ । धनगढीमा आईएमईका कर्मचारीलाई गोली हानेर पैसा लुट्ने दुई जनालााई प्रहरीले सोमबार काठमाडौंमा पक्राउ गरेको छ ।

महानगरीय अपराध महाशाखाले धनगढीका राम प्रवेश राना र कञ्चनपुरका कालु रानालाई पक्राउ गरेको हो।

उनीहरुले गत जेठ १३ गते आइएमई सेन्टरका कर्मचारी निर्मल कार्कीलाई गोली हानी घाइते बनाएर उनीसँग रहेको साढे नौ लाख लुटेका थिए।

सिद्धार्थ बैंकबाट पैसा निकालेर आफ्नो कार्यालयतर्फ जाने क्रममा कार्कीमाथि आक्रमण भएको थियो । घाइते कार्कीको अवस्था हाल सामान्य छ।

पक्राउ परेकामध्ये कालु राना २०६८ सालमा बलात्कार मुद्दामा जेल परे्र छुटेका व्यक्ति भएको खुलेको छ। उनी गत माघमा मात्र जेलबाट छुटेका थिए।

५ जना मिलेर उनीहरुले सो लुटपाट योजना बनाएका थिए। घटनामा संलग्न राजकुमार चौधरी र उग्रसेन चौधरी यसअघि नै पक्राउ परिसकेका छन्।

पक्राउ परेकाहरुलाई जिल्ला प्रहरी कार्यालय कैलालीमा पठाइएको छ।