काठमाडौं २२ जेठ । विकास क्षेत्रमा कलम चलाउने पत्रकारहरुको क्षमता अभिवृद्धि गर्न विकास पत्रकार मञ्च (फोडेज) नेपालले इन्टरनेशनल कल्चरल अफेयर्स (आईसिए) को सहकार्यमा एक दिने कार्यशाला सञ्चालन गरेको छ ।

राजधानीमा सोमबार भएको एक दिने कार्यशालामा समय व्यवस्थापनदेखि विषयवस्तुको प्रस्तुतिसम्मका विषय समेटिएका थिए । आईसिएका अध्यक्ष प्राध्यापक डा. तत्वप्रसाद तिमिल्सिनाले सञ्चारकर्मीलाई समय व्यवस्थापन चुनौति भएको भन्दै आफ्नो क्षेत्रमा अघि बढ्न, योजना पूरा गर्न र कामलाई निरन्तरता दिन समयको अहं भूमिका हुने बताउनुभयो ।

एडवार्ड डेमिङले भनेजस्तै व्यक्तिगत रुपान्तरणविना केही कुरा सम्भव हुँदैन भन्दै उहाँले भन्नुभयोे, ‘व्यक्ति होस् वा संस्था, सफल हुनका लागि भिजन र एक्सनसहितको स्ट्राटेजिक प्लान नबनाएसम्म कठिन छ ।’ उहाँले विकास पत्रकारीता अहिलेको आवश्यकता भएको पनि बताउनुभयो ।

प्रशिक्षक हरेराम भट्टराईले विकास पत्रकारिताका समाचार विगतको तुलनामा धेरै आउन थालेको तर अझै गहिराईमा नआएको बताउनुभयो । उहाँले, भन्नुभयो, ‘समाचारमा तथ्य, अनुसन्धान र उदाहरणले पुष्टि दिन सके गरिमा बढ्नेछ, पाठकका लागि त्यो पत्रकार ब्राण्ड बन्न सक्नेछ । ’

त्यसैगरि कार्यक्रममा फोडेजका अध्यक्ष गोपीकृष्ण ढुंगानाले विकास पत्रकारिताको उद्देश्य प्राप्तिका लागि विगतको अनुभवसँग क्षमता अभिवृद्धिका लागि गरिएका सबै प्रयासलाई घुलमिल गरेर अघि बढ्नुपर्नेमा जोड दिनुभयो ।
मञ्चका सचिव चन्द्रमणि भट्टराईले पत्रकारको आन्तरिक सञ्चार, अनुभव एवं सूचना आदान प्रदान, स्थलगत भ्रमण अवलोकनबाट पत्रकारको क्षमता विकास गर्ने र यसबाट पत्रकारको वुझाइमा एक रुपता ल्याउने काममा फोडेज लागिरहेको बताउनुभयो ।

त्यसैगरि फोडेजकी सदस्य सन्तोषी अधिकारीले मानव जीवनमा गुणात्मक परिवर्तन ल्याउन सक्नु नै विकास पत्रकारिताको उदेश्य भएकाले परम्परागत पत्रकारिताले नभइ प्रविधिजन्य, समय सुहाउँदो पत्रकारिताले नै समयको मागअनुरूप विकास गर्न सक्ने बताउनुभयो । कार्यशाला गोष्ठिमा टेलिभिजन, अखबार, अनलाइन र एफएमका सञ्चारकर्मी सहभागी थिए ।