काठमाडौँ । काठमाडौँ उपत्यकामा आज (आइतबार) अपराह्नदेखि साँझसम्म हल्कादेखि मध्यम वर्षा हुने सम्भावना रहेको मौसम पूर्वानुमान महाशाखाले जनाएको छ।

महाशाखाकी मौसमविद् बिनु महर्जनका अनुसार बिहानदेखि दिउँसोसम्म उपत्यकाको मौसम घाम र बादलको मिश्रित अवस्थामा रहनेछ। दिउँसोपछि भने बादल बढ्दै जाने र विशेषगरी साँझपख वर्षा हुने सम्भावना रहेको छ।

“दिउँसो २/३ बजेतिरबाट बादल बढ्दै जाने र विशेषगरी साँझपख हल्कादेखि मध्यम वर्षा हुने सम्भावना देखिएको छ,” मौसमविद् महर्जनले बताइन्।

उनका अनुसार आज काठमाडौँ उपत्यकामा वर्षा हुने सम्भावना करिब ६० प्रतिशत रहेको छ। वर्षा भए पनि निरन्तर वा लामो समयसम्म भारी वर्षा हुने सम्भावना भने तत्काल देखिएको छैन।

मौसम पूर्वानुमान महाशाखाले देशभरको मौसमसम्बन्धी विस्तृत विवरण बिहान ८ बजेपछि सार्वजनिक गर्ने जनाएको छ।

वर्षालाई कसरी वर्गीकरण गरिन्छ ?

मौसमविद्का अनुसार २४ घण्टाको अवधिमा १० मिलिमिटरभन्दा कम वर्षा भएमा त्यसलाई हल्का वर्षा मानिन्छ। १० देखि ५० मिलिमिटरसम्म वर्षाभएमा मध्यम वर्षा भनिन्छ।

त्यस्तै, ५० देखि १०० मिलिमिटरसम्म वर्षा भएमा भारी वर्षा, १०० देखि २०० मिलिमिटरसम्म भएमा धेरै भारी वर्षा र २०० मिलिमिटरभन्दा बढी वर्षाभएमा अति भारी वर्षा मानिन्छ।

मौसममा हुन सक्ने परिवर्तनलाई ध्यानमा राख्दै महाशाखाले आवश्यक सावधानी अपनाउन तथा अद्यावधिक मौसम सूचना हेर्न सर्वसाधारणलाई आग्रह गरेको छ।

Originally published on abcnews.com.np.