काठमाडौँ ,१ असार । शिक्षक सेवा आयोगले प्राथाकि तहका लागि एकै पटकमा दश हजार शिक्षक मागेको छ ।

आयोगले शुक्रबार सूचना प्रकाशित गरी खुला तथा समावेशी रूपमा ९ हजार ९९६ शिक्षक माग गरेको हो । दरखास्त फाराम संकलन तथा रुजु सम्बन्धित जिल्लाको शिक्षा विकास तथा समन्वय इकाईले गर्ने आयोगले जनाएको छ।

असार ३० गतेसम्म दरखास्त फाराम भर्न सूचित गरेको छ। दोब्बर दस्तुरमा साउन ५ गतेसम्म फाराम भर्न सकिनेछ। शिक्षा विषयमा दश महिनाको तालिम वा शिक्षा शास्त्र संकायमा कम्तीमा प्रवीणता प्रमाणपत्र वा सो सरह उत्तीर्णले परीक्षा फाराम भर्न सक्नेछन्।

आयोगले ७७ वटै जिल्लाका लागि दरखास्त आह्वान गरेको हो । विज्ञापन अनुसार आदिवासी जनजाति कोटामा एक हजार २१५ जना, मधेशीतर्फ ९८६, दलितमा ४०५, अपाङ्गता भएका व्यक्तिका लागि २२५ र पिछडिएका क्षेत्रका लागि १८० कोटा छुट्याएको छ ।