सिन्धुली, ५ असार । सामान्यतः मंगलबारको साँझ सिन्धुलीको कमलामाई मन्दिरमा निकै चहल पहल थियो । साँझ परेसँगै अँधेरो रहने मन्दिरमा निकै चहलपहल हुनुले केही नयाँ हुँदैछ कि भन्ने छनक दिएकै थियो । मन्दिर परिसरमा कोही भजन गाइरहेका थिए, कोही मन्दिर क्षेत्रमा सेल्फी खिच्नेहरुको भीड नै थियो ।

खास कारण थियो, मन्दिरमा सोलार बत्ती जडानको औपचारिक उद्घाटन । प्रसिद्ध कमलामाई मन्दिरमा सोलार सिस्टमसहित प्mलग लाइट र एलइडी पाइप लाइट जडान गरिएको छ । बरिष्ठ समाजसेवी उज्ज्वल विक्रम थापाले मंगलबार सोलार सिस्टमसहितको बत्तीको शुभारम्भ गर्नुभयो ।
कार्यक्रममा समाजसेवी थापाले भाषणले देश विकास नहुने भन्दै युवाको सहभागिता र सक्रियतामा मात्र मुलुकको समृद्धि सम्भव हुने बताउनुभयो ।
उहाँले आप्mनो ठाउँका लागि आफैँले प्रयत्न गर्नुपर्नेमा जोड दिदै स्थानीयवासीको सहभागिताले नै विकासले गति पाउने बताउनुभयो ।
उहाँले कमलामाई मन्दिरलाई धार्मिक पर्यटकीय स्थानका रुपमा विकास गर्न सकिने सकिने बताउनुभयो ।
कार्यक्रममा कमलामाई नगरपालिका वडा नम्बर ५ का अध्यक्ष पूर्णबहादुर खड्काले प्रसिद्ध कमलामाई मन्दिरमा सोलार जडानसहित मन्दिर सुरक्षा र सुन्दरताका लागि बत्ती राखिएकामा समाजसेवी थापालाई धन्यवाद दिदै मन्दिरलाई पर्यटकीय क्षेत्र बनाउन अधिकतम प्रयत्न गरिने बताउनुभयो ।
कार्यक्रममा रेन्बो संगीत पाठशाला र नयाँ चौतारी युवा क्लव चियाबारीले भजन प्रस्तुत गरेका थिए ।
समाजसेवी थापाको पहल, सक्रियता र सहयोगमा मन्दिरमा सोलार र बत्ती जडान गरिएको हो । सिन्धुली ट्रष्ट नेपालको सहयोगमा पुनर्निर्माण तथा पुनःस्थापना अभियान अन्तर्गत मन्दिरमा सोलार जडान गरिएको हो । मन्दिरमा सोलार तथा बत्ती जडानका लागि भिमान युवा क्लवको महत्वपूर्ण सक्रिय सहभागिता रहेको थियो ।