काठमाडौं,१४ साउन । साउन महिनाको दोस्रो सोमबार आज पनि हिन्दू धर्माबलम्बी नारीहरुले भगवान शिवको पूजा आराधना गरी मनाउँदैछन् ।

साउनको सोमबार शिवको पूजाआजा गर्दा मनोकाक्षा पूरा हुने विश्वासका साथ बिहानैदेखि महिला दिदीबहिनीहरु शिवमन्दिरमा गएर पूजाआजा गरिरहेका छन् । विशेषगरी महिलाहरुले हरियो रंगका वस्त्र, चुरा र मेहंदी लगाएर भगवान शिवको पूजा तथा आराधना गरी ब्रत बस्ने गर्छन ।

आज पशुपतिनाथको मन्दिरमा बिहानै भक्तजनहरुको घुइचो लागेको छ । यसपटकको साउनमा ५ वटा सोमबार परेकाले पनि व्रतको अझ महत्व हुने धार्मिक विश्वास गरिन्छ । साउन महिनामा ब्रत बसेर हरियो रंगको चुरा, कपडा र मेहेन्दी लगाए शिव खुशी हुने र मनोकांक्षा पुरा हुने बताइन्छ ।

ब्रतालुहरुले आफ्नो मनोकांक्षा पुरा होस भन्ने कामनाले भगवान शिवको पुजा आरचना गरेको बताएका छन् ।साउनको पहिलो सोमबारदेखि सुरु भएको बोलबमका तिर्थालुहरुको घुईचोले पशुपतिनाथ परिसर भरिएको थियो । यसैगरि देशका विभिन्न भागका शिवालयहरुमा भक्तजनहरुको घुईचो लागेको छ ।