कालिकोट , १४ साउन । पलाँता गाउँपालिका १ मा रकेको एक विद्यालयको भवन निर्माणका लागि आएको १९ लाख दुरुपयोग भएको पाइएको छ ।

जिल्ला शिक्षा कार्यालयले कालिका माध्यामिक विद्यालयको दुई तले भवन निर्माणका लागि छुट्याएको १९ लाख रुपैयाँ सकिएको छ तर विद्यालय भवनको जग पनि खनिएको छैन ।

विद्यालयका प्रधानाध्यापक, विद्यालय व्यवस्थापन समिति अध्यक्ष, शिक्षाका प्राविधिक र वडा अध्यक्षको मिलोमोतोमा दुरुपयोग भएको स्थानीयले आरोप लागाएका छन् ।

दोस्रो तला निर्माणका लागि अर्को १९ लाख रकम गाउँपालिकामा आएपछि गाउँपालिका अध्यक्ष लक्ष्मण बहादुर बम पहिलो तला अनुगमनको लागि कालिका माविमा पुग्नुभएको थियो । तर विद्यालय भवनको जगसमेत खनिएको छैन ।

अनुगमनका लागि गएका गाउँपालिका अध्यक्षले भवन निर्माणका लागि जग समेत नखनेको भेटेपछि अनियमितता गर्नेलाई तत्काल छानविन गरी कारवाही गरिने बताउनुभयो ।

अहिलेसम्म १९ लाख बजेट सकिइसकेको छ तर काम ढुंगा र बालुवा जम्मा गर्ने मात्र भएको छ ।

विद्यालयको खातामार्फत चैतमा ९ लाख रुपैयाँ र असाढ मसान्तमा ९ लाख रुपैयाँ सामान खरिदका लागि आएको र सामान खरिद प्रक्रियामा रहेको विद्यालयका प्रधानाध्यापक पदमबुचा मगरले जानकारी दिनुभयो ।

विद्यालयमा निर्माण भएका अन्य भवन पनि बस्नका लागि योग्य छैनन् । भवन ३ वटा छन् तर प्रयोगमा आउन सकेका छैनन् । विद्यालय व्यवस्थापन समितिले भने समिति भित्रै एकअर्काले काम गर्न नदिएको भन्दै आरोप लगाउँदै आइरहेका छन् ।