काठमाडौं,१७ साउन । कञ्चनपुरको १३ वर्षीया बालिका बलात्कार हत्या काण्ड संसदसम्मै चर्किएको विषय हो । उक्त घटनाबारे प्रहरीले तिब्र अनुसन्धान बढाएको थियो । हालचालै प्रहरीले अनुसन्धानमा दुई जनालाई पक्राउ गरेको छ ।

साउन १० गते कञ्चनपुरको भीमदत्त नगरपालिकाकी १३ वर्षकी निर्मला पन्तको बलात्कारपछि हत्या भएको भन्दै पीडित परिवारले प्रहरीमा उजुरी दिएको थियो ।

दिएको उजुरीको आधारमा प्रहरीले कैलालीको मोहन्याल गाउँपालिका ५ का २२ वर्षका जीवन घर्तीमगर र १७ वर्षका दीपक नेगीलाई पक्राउ गरेको हो । सो घटनाबारे  प्रतिनिधिसभाको बिहिबारको बैठकमा गृहमन्त्री राम बहादुर थापाले सदनलाई जानकारी दिएका हुन्। उनका अनुसार पोष्टमार्टम रिपोर्टमा बालिकाको घाँटी थिचेर हत्या गरिएको पाइएको छ ।

स्थानीय सरस्वती माध्यमिक विद्यालयमा १० कक्षामा पढ्दै गरेकी निर्मला ट्युसन पढ्न गएको अबेर सम्म नफर्किएपछि परिवारले त्यसै दिन राति १० बजे प्रहरीलाई खबर गरेका थिए । उनको शव उखुबारीमा भेटिएको थियो ।