जाजरकोट, २० साउन । जाजरकोटको भेरी नगरपालिका–३ ठाटिबजारमा गएको पहिरोमा परी पुरिएका मध्ये नौ जनाको शव फेला परेको छ। मृत्यु हुनेमा १३ वर्षीय नरेन्द्र परियार, ११ वर्षीय नविन परियार, ८ वर्षीय गोविन्द परियार, १० वर्षीय दर्शक परियार रहेका छन्। यस्तै नेपाल पत्रकार महासंघ जाजरकोटका सदस्य तिर्थ बहादुर बोहराकी ८ वर्षीया छोरीको नज्मा बोहराको पनि पहिरोमा पुरिएर मृत्यु भएको छ। अन्य दुर्इ बालिका र एक महिलाको मृत्यु भएपनि उनीहरूको पहिचान खुल्न नसकेको प्रहरीले जनाएको छ।

उक्त घटना अकल्पनिय भएको भन्दै वन तथा वातावरण मन्त्री शक्ती बस्नेतले गहिरो दुख व्यक्त गर्दै उद्धार कार्यलाई प्रभावकारी बनाउन गृहमन्त्री राम बहादुर थापासँग छलफल गरि प्रदेश सरकारलाई उद्धारमा कुनैपनि कसर नराख्न निर्देशन गरिएको छ ।

थप उद्धारकालागि आवश्यक परे सुर्खेत बाट हेलिकप्टर पठाउने तयारी समेत भएको छ । प्रदेशका मुख्यमन्त्रीलाई वस्नेत आफैले फोन गरेर उक्त घटनाको जानकारी लिएका छन् । मन्त्री बस्नेत मौसमले साथ दिएमा आफै जाजरकोट जाने बताएका छन् ।