काठमाडौं ३० साउन। जनतासँग प्रधानमन्त्री कार्यक्रम बुधबार (आज) देखि हरेक हप्ता प्रत्यक्ष प्रसारण हुने भएको छ। यसअघि यो कार्यक्रम पाक्षिक रूपमा प्रसारण हुँदै आएको थियो।

कथा नेपालले निर्माण गरिरहेको कार्यक्रम साउन २ र साउन १६ गते रेकर्ड गरेर प्रसारण गरिएको थियो।
आजदेखि कार्यक्रम नेपाल टेलिभिजन, एबीसी टेलिभिजन, एपीवान एचडी, हिमालय टेलिभिजन  र जनता टेलिभिजनमा राती ९ बजेदेखि १० बजेसम्म प्रत्यक्ष प्रसारण हुने कार्यक्रमका संचालक तथा निर्माता मनोज पाण्डेले बताए।

साथै ‘जनतासँग प्रधानमन्त्री’ कार्यक्रमको फेसबुक पेज र ‘हाम्रो कथा’ युट्युब च्यानलबाट पनि प्रत्यक्ष प्रसारण हेर्न सकिनेछ।
यसपटकदेखि कार्यक्रममा दर्शकले टेलिफोन तथा सामाजिक सञ्जालहरू फेसबुक र ट्विटरमार्फत् प्रधानमन्त्रीसमक्ष सिधै प्रश्न राख्न पाउने व्यवस्था मिलाइएको छ।

टेलिफोनमार्फत् प्रश्न राख्न कार्यक्रम सुरू भएपछि नेपाल टेलिभिजनको फोन नम्बर ०१–४२००५१२ र ०१–४२००५१३ मा फोन गर्नुपर्नेछ भने ‘जनतासँग प्रधानमन्त्री’को फेसबुक पेज तथा ट्विटरबाट पनि प्रश्न तथा आफ्नो गुनासो राख्न पाइने व्यवस्था मिलाइएको कथा नेपालले जनाएको छ ।