काठमाडौं,१ भदौ । विप्लब नेतृत्वको नेपाल कम्युनिष्ट पार्टीका प्रवक्ता खड्गबहादुर विश्वकर्माले (प्रकाण्ड) आफूले पार्टीको नीति अनुसार चन्दा उठाएको बताएका छन्। प्रहरी हिरासतमा रहेका प्रवक्ता विश्वकर्माले सरकारी वकिलसहितको बयानमा सो कुरा बताएका हुन ।

उनको बयानमा पार्टीको नीति अनुसार दिन सक्नेहरूलाई भौतिक र आर्थिक सहयोग मागेका हौँ। भन्ने उल्लेख गरिएको छ । नेता विकले विभिन्न उद्योग, विद्यालय, व्यापारीलगायतबाट चन्दा उठाएको प्रहरी अनुसन्धानमा देखिएको हो।

प्रहरीले भने चन्दा उठाएको प्रमाण भएको र अदालतबाट म्याद लिएर नै हिरासतमा राखिएको जवाफमा उल्लेख गरेको छ। महानगरीय प्रहरी परिसर काठमाडौँले बिहीबार लिखित कारणसहित नेता विकलाई उपस्थित गराएको थियो।

विकको रिटमा शुक्रबार बहस हुनेछ। उनले ७ करोड ५० लाख रुपैयाँभन्दा बढी चन्दा संकलन गरेका देखिएको प्रहरीको दाबी रहेको छ।

२०६८ सालमा झलनाथ खनाल प्रधानमन्त्री रहँदा पर्यटन तथा नागरिक उड्ययन मन्त्रीसमेत रहेका विकलाई चन्दा लिएको अभियोगमा एक साताअघि पक्राउ गरेको थियो। उनको खातामा अहिले पनि २ करोड रुपैयाँ देखिएको प्रहरी स्रोतको दाबी छ।