काठमाडौं, २ भाद्र । प्रधानमन्त्री केपी शर्मा ओलीले संविधानमा कतै विभेद भए त्यसलाई संशोधन गर्न केन्द्र सरकार तयार रहेको बताउनुभएको छ ।

शनिबार जनकपुरमा प्रदेश २ को प्रदेशसभालाई सम्बोधन गर्दै प्रधानमन्त्री ओलीले मौका मिले प्रदेश २ ले पनि केही गरेर देखाउने भन्दै सरकार विभेदको पक्षमा नरहेको बताउनुभएको हो ।

पहिलो पटक प्रदेश २ को संसदमा सम्बोधन गर्दै ओलीले कलकत्ता जाने पानीजहाज प्रदेश २ बाटै हुँदै जाने भन्दै प्रदेश २ देशकै समृद्ध प्रदेश हुन सक्ने बताउनुभयो । ओलीले बाढीका कारण प्रदेश २ धेरै प्रभावित हुने भएकाले भारतसँग यस विषयमा छलफल गर्ने जिकिर गर्नुभयो ।

नागरिकताका सम्बन्धमा तराई सेन्टिमेन्टल भएको भन्दै ओलीले हरेक नेपालीले नागरिकता पाउने बताउनुभयो । ओलीले समृद्ध नेपाल सुखी नेपाली भन्ने नारालाई सबैको साथ रहेको पनि बताउनुभयो ।

प्रदेश २ को विकाससँग प्रत्यक्ष सरोकार राख्ने निजगढ विमानस्थल, फास्ट ट्रयाक, पूर्व पश्चिम राजमार्ग लगायतका विकास निर्माणका कार्यले राम्रो गति लिइरहेको भन्दै ओलीले यसलाई छिट्टै सम्पन्न गर्ने दाबी गर्नुभयो ।

उहाले तराईको विकासको लागि सहरी विकास मन्त्रालयले ७० प्रतिशत बजेट विनियोजन गरेको दाबी गर्नुभयो । प्रधानमन्त्री ओलीले बैठकलाई सम्बोधन गर्न सुरु गरेपछि केहि राजपा नेपालका प्रदेशहरुले बैठक बहिस्कार गरेर बाहिरिएका थिए ।