काठमाडौ,७ भाद्र ।कञ्चनपुरको बालिका निर्मला पन्तको बलात्कारपछि हत्या गरिएको घटनाका दोषीलाई कारवाहीको माग गर्दै बिहीबार बिहानैदेखि प्रदर्शनकारीले प्रदर्शन गरिरहेका छन् ।

प्रहरीले हत्याका मुख्य अभियुक्तलाई बचाउन मानसिक अवस्था ठिक नभएका व्यक्तिलाई सार्वजनिक गरेको भन्दै आन्दोलनकारी थप आक्रोशित भएका हुन  आन्दोलनकारीले सडक र चोकचोकमा टायर बाल्दै नारावाजी गरेर प्रदर्शन गरिरहेका छन् ।

भीमदत्त नगरपालिकाकी १३ वर्षीया निर्मलाको शव गत साउनमा उखुबारीमा भेटिएको थियो । उनको बलात्कारपछि हत्या भएको भन्दै परिवारका सदस्यले साउन १० गते प्रहरीमा उजुरी दिएका थिए ।

जिल्ला प्रहरी कार्यालयले भदौ ५ गते निर्मलाको हत्यामा संलग्न भएको भन्दै भीमदत्त नगरपालिका(१९ बागफाँटाका ४१ वर्षीय दिलीपसिंह विष्टलाई सार्वजनिक गरेको थियो । पन्तको बलात्कारपछि हत्या भएको र स्थानीय प्रशासनले वास्तविक हत्यारालाई उम्काउन खोजेको दाबीसहित स्थानीयबासीले आन्दोलन गर्दै आएका छन् ।

बुधवारसम्म सदरमुकाम महेन्द्रनगरमा सीमित रहेको आन्दोलन बिहीवार जिल्लाभरि फैलिएको छ । आन्दोलनमा विद्यार्थी, महिला, व्यापारी, बुद्धिजीवी, नागरिक अगुवा, सर्वसाधारण लगायतको सहभागिता रहेको छ । बिहीवार आन्दोलनलाई नियन्त्रणमा लिन भन्दै प्रशासनले कैलालीबाट समेत सुरक्षाकर्मी झिकाएको छ । महेन्द्रनगरका चोकचोकमा दंगा प्रहरी र सशस्त्र प्रहरी परिचालन गरिएका छन् ।