काठमाडौं , ९ भाद्र ।  नेपाल मेडासिटी हस्पिटलले निस्शुल्क स्वास्थ्य परिक्षण कार्यक्रम आयोजना गरेको छ । जैन धर्माबलम्बी तेरापंथ महिला मण्डल र पूर्ण महिला मण्डलको अगुवाईमा नेपाल मेडिसिटी अस्पतालमा स्वास्थ्य परीक्षण कार्यक्रमको आयोजना गरिएको हो ।
नागरिकले आफ्नो स्वास्थ्यप्रति ध्यान दिई सुखी र समृद्ध राष्ट्र निर्माणको लागि काम गर्नुपर्ने भएकाले स्वास्थ्य परिक्षण कार्यक्रमको आयोजना गरिएको श्री जैन श्वेताम्बर तेरापंथ महिला मण्डलकी अध्यक्ष श्रीमती रश्मि जैनले बताउनु भयो । कार्यक्रममा करिब एक सय १ जनाले स्वास्थ्य परिक्षण गराएका थिए ।

स्वास्थ्य उपचारबाट सबै नागरिकहरुले लाभ पाउन र स्वास्थ्य सबै नागरिकहरुको पहुंचमा होस् भन्ने हेतुले समाजसेवी तथा उद्योगपति डा. उपेन्द्र महतो तथा डा. समता प्रसादले उत्कृष्ट पूर्वाधार एवं प्रविधियुक्त नेपाल मेडिसिटी अस्पतालको स्थापना गर्नुभएको हो । विश्वस्तरिय सेवा सञ्चालन गरिरहेको मेडिसिटीले आगामी दिनमा पनि यस किसीमको स्वास्थ्य परिक्षणलाई प्राथमिकता दिने बताएको छ ।

स्वास्थ्य सबै नागरिकहरुको पहुंचमा पुर्याउन अस्पतालले स्वास्थ्य बीमा कार्यक्रमको माध्यमबाट गुणस्तरीय स्वास्थ्य सेवालाई सुलभ बनाई आम नागरिकहरुले पनि यसको सेवा लिन सक्ने ब्यवस्था पनि गरेको नेपाल मेडिसिटी हस्पिटलका जनरल म्यानेजर विजय रिमालले बताउनुभयो । मेडिसिटी अस्पतालले उपचार गर्नुभन्दा रोग लाग्न नदिनु नै बुद्धिमानी भन्ने कुरालाई मध्यनजर गरि अस्पतालमा वेलनेश विभागको स्थापना गरेको छ । ललितपुरको नख्खुस्थित अस्पतालले गुणस्तरीय उपचार र बिरामीको सुरक्षालाई पहिलो प्राथमिकतामा राख्दै सेवा दिइरहेको छ ।

३० रोपनी जग्गामा निर्मित अस्पतालका अत्याधुनिक भवन भूकम्प प्रतिरोधात्मक छन् । अस्पतालका अध्यक्ष डा. महतोले कुनै पनि नेपालीले कुनै पनि रोगको उपचार गर्न विदेश धाउन नपरोस् र बिदेसिएको जनशक्ति नेपालमा फर्काउन अस्पताल सञ्चालनमा ल्याएको बताउनुभयो । अस्पताल दक्षिण,पूर्वी एसिया क्षेत्रकै उत्कृष्ट बनाउन अत्याधुनिक प्रविधि, नयाँ, नयाँ सेवा विस्तारमा आफु लागिपरेको जानकारी दिनुभयो ।

त्यसैगरि तेरापन्थ महिला मण्डलहरुको अहिंसा, सदाचार, नैतिकता र नशामुक्तिको अभियानप्रति ऐक्यबद्धता जनाउँदै नेपाल मेडिसिटी अस्पतालले स्वास्थ्य परीक्षण कार्यक्रमलाई निरन्तर रुपमा सहयोग गर्ने प्रतिबद्धता जनाएको छ । भगवान महावीरको मुख्य सिद्धान्त अहिंसात्मक विचारधारामा हिड्ने जैन धर्मका अनुयायीहरु परोपकारी कार्यक्रमहरुको आयोजनामा अग्रणी रहँदै आएको छ ।