काठमाडौं ,१९ भाद्र । प्रधानमन्त्री केपी शर्मा ओलीले बिमस्टेकलाई मिलिट्री प्याक्ट बनाउने गरी कुनै सम्झौता नभएको प्रस्ट पार्नुभएको छ ।  प्रतिनिधिसभाको मंगलबारको बैठकमा सांसदहरूले उठाएका प्रश्नको जवाफ दिने क्रममा प्रधानमन्त्री ओलीले नेपाल मिलिट्री प्याक्टमा विश्वास नगर्ने बताउनुभएको हो ।

उहाँले सैन्य अभ्यासको कुराप्रति पनि अनविज्ञता प्रकट गर्नुभयो । प्रधानमन्त्री ओलीले नेपाली सेनाप्रतिको विश्वास , कामबाटै पुष्टि भएको समेत बताउनुभयो । प्रधानमन्त्री ओलीले बिम्स्टेक सम्मेलनका क्रममा विदेशी नेताहरुको सुरक्षार्थ आएका सुरक्षाकर्मीको विषयलाई अनावश्यक ढंगले विवाद सिर्जना गर्न खोजेको बताउनुभयो ।

ओलीले कतिपय विषयलाई अनावश्यक ढंगले उछाल्नु उचित नहुने भन्दै सुरक्षाको विषयलाई ठीक ढंगले उठाउनु पर्ने बताउनुभयो । प्रधानमन्त्री ओलीले बिमस्टेक सार्कको विकल्प नभएको समेत प्रस्ट पार्नुभयो ।

बैठकमा विपक्षी सांसदहरुले भने विमस्टेक सम्मेलनमा विवादित सैन्य अभ्यासबारे सहमति गरिएको र रिट्रिट पनि तोकिएको ठाउँमा गर्न नसकेकोमा सरकारको आलोचना गरेका थिए ।

कांग्रेस सांसद दिव्यमणि राजभण्डारीले विमस्टेकको कुनै एजेण्डामा नै नभएको संयुक्त सैन्य अभ्यासबारेको निर्णयले नेपालीहरु सशंकित भएको बताउनुभयो । कांग्रेस सांसद मिनेन्द्र रिजालले सम्मेलन प्राविधिक र आर्थिक विषयको भए पनि सैन्य अभ्यासको निर्णय कसरी आयो भनी प्रश्न गर्नुभयो ।

सांसद भरतकुमार शाहले गोकर्ण रिसोर्टमा रिट्रिट गर्ने भनेको बाटो बनाउन नसकेर सोल्टी होटलमा नै गर्नुपर्दा सरकारको सामथ्र्य देखिएको भनी व्यंग्य गर्नुभयो ।