झापा ,२४ भाद्र । दक्षिणी झापाको कचनकवल गाउँपालिकामा प्रर्दशनकारीहरुले तालाबन्दी गरेको छ । गाउँपालिकाका अध्यक्ष अञ्जार आलमले बहुमतको आधारमा एकलौटी ढंगबाट दोस्रो गाउँसभा गर्न खोजेपछि आन्दोलित बनेका प्रर्दशनकारीले आइतबार दोस्रो दिन तालाबन्दी गरेको हुन् ।

शनिवार गाउँपालिकाका जनप्रतिनिधि बीच गाउँसभामै हातपात भएपछि अध्यक्ष आलमले आइतबार विहान ८ बजेसम्म सभा स्थगन भएको घोषणा गरेका थिए ।

आइतबार विहान पुनः गाउँसभा गर्न खोजपछि असन्तुष्ट पक्षका जनप्रतिनिधि, नेपाल कम्प्युनिष्ट पार्टी र नेपाली काँग्रेसका कार्यकर्ताहरु तालाबन्दीसहित विरोध प्रर्दशनमा उत्रिएको नेपाली काँग्रेसका महासमिति सदस्य भुमिप्रसाद राजवंशीले बताउनुभयो ।

गाउँपालिका ६ स्थित बनियानी बजारमा भेला भएका प्रर्दशनकारीले सडकमा टायर बाल्दै विरोध र्याली निकालेका थिए । र्यालीसहित गएका प्रर्दशनकारीले गाउँसभास्थलमा सूचना टाँस गर्दै तालाबन्दी गरेको छ ।

आन्दोलित बनेका स्थानीयको माग सम्बोधन नभएसम्म तालाबन्दी गरिएको र लगाइएको तालालाई जबरजस्ती खोल्न खोजे यसको जवाफदेही स्वमय सम्बन्धित निकायले लिनुपर्ने नेकपाका नवराज भट्टराईले जानकारी दिनुभयो । यता सभास्थलमा तालाबन्दी गरे पश्चात प्रर्दशनकारी गाउँपालिकाको कार्यालयतर्फ गएका छन् ।

प्रर्दशनकारीहरुले गाउँपालिकाको केन्द्र बनियानीलाई सार्न पाइँदैन, तानाशाह एकाधिकार अन्त्य गर, विकास निर्माण कार्य पारदर्शी गर, शिक्षा कार्यविधि खारेज गर, गाउँपालिकालाई कार्यकर्ता भर्ति केन्द्र बन्द गर र पार्टी कार्यकर्ता मुखी बजेट खारेज लगायतको नारा लगाउँदै गाउँपालिका कार्यालय पुगेका थिए ।

गाउँपालिकामा नेपाल प्रहरी र सशस्त्र प्रहरीको सुरक्षा घेरामा रहेको छ । प्रर्दशनकारीले गाउँपालिकामा ताला लगाउन खोजेपनि प्रहरीले बल प्रयोग गरेर उनीहरुलाई बाटैमा रोकेपछि घटनास्थल तनावग्रस्त बनेको छ । उनीहरु अहिले कोणसभा गर्दै बिरोध प्रर्दशनलाई जारी राखेको छ । यता गाउँपालिका अध्यक्ष आलमले दिउँसो ३ बजेपछि असन्तुष्ट पक्षसंग बार्ताका लागि आवहन गरेको छ ।

यता शनिवार दिउँसो दोस्रो सभाको उद्घाटन कार्यक्रममा जनप्रतिनिधिहरु बीच हातपात भएको थियो । जनप्रतिनिधि बीच भएको हातपातपछि घम्साघम्सीमा परीे कचनकवल ७ महिला सदस्य लक्ष्मी इदिङ्गो घाइते भएका छिन् । उनको टाउँकोमा चोट लागेको छ ।