झापा १८ असोज । इलामबाट झापातर्फ आइरहेको जिपको ठक्करबाट एक साइकलयात्रीको मृत्यु भएको छ, भने अन्य तीन जना घाइते भएका छन् ।

मेची राजमार्ग अन्तरगत झापाको मेचीनगर १३ स्थित कालीझोडा भन्ने स्थानमा विहीवार विहान इलामबाट झापातर्फ आइरहेको मे १ ज २४६२ नम्बरको जिपले साइकलयात्रीलाई ठक्कर दिएको थियो ।

जिपको ठक्करबाट अर्जुनधारा नगरपालिका ५ निवासी ६० बर्षिय बिष्णुप्रसाद विकको मृत्यु भएको जिल्ला टाफिक प्रहरी कार्यालय बिर्तामोडका प्रहरी निरीक्षक राजेश राईले जानकारी दिए ।

उनका अनुसार जिपले पहिला साइकलयात्री विकलाई ठक्कर दिएका थिए, त्यसपछि जिप अनियन्त्रित भई बाटैमा उभिरहेका अर्को साइकलयात्री मेचीनगर १२ निवासी ३८ बर्षीय टंक रोक्कालाई ठक्कर दिएका थिए । साइकलयात्रीलाई ठक्कर दिएपछि जिप पल्टिदाँ जिपमा सवार इलाम नगरपालिका ७ निवासी ५५ बर्षीय विजेन्द्र रिजाल र सोही जिल्ला जोगमाई ४ निवासी १९ बर्षीय बिशाल सापकोटा सामान्य घाइते भएका छन् ।

घाइते चारै जनालाई उपचारका लागि बिर्तामोडस्थित बिएण्डसी हस्पिटल लगिएपनि साइकलयात्री विकको उपचारको क्रममै मृत्यु भएको प्रहरी निरीक्षक राईले बताए । यता जिपलाई प्रहरीले नियन्त्रणमा लिएको छ भने जिप चालक फरार रहेको प्रहरीले जनाएको छ ।