उदयपुर,३० असोज । निर्माणधिन मदन भण्डारी लोकमार्गमा पर्ने उदयपुरको त्रियुगा नगरपालिका ७ कौवाईमा मंगलबार बिहान मोटरसाईकल दुर्घटना हुँदा चलकको घटनास्थलमा मृत्यु भएको छ भने एक जना घाइते भएका छन् ।

जिल्ला प्रहरी कार्यालय उदयपुरका डिएसपी मेघराज अधिकारीका अनुसार गाईघाट–नेपालटार सडक खण्डको कौवाईमा स८प ९८०८ नम्बरको मोटरसाईकल दुर्घटना हुँदा चालक त्रिनपा १३ बसपार्कका ५० बर्षीय दिनेश पौडे्लको मृत्यु भएको हो ।

डिएसपी अधिकारीले दुर्घटनामा मोटर साईकलमा सवारत त्रिनपा १३ का ४५ बर्षीय कुलबहादुर थापा गम्भिर घाईते छन। रौतामाई गाउँपालिकाको वडानं ७ मुर्कचीबजारबाट त्रिनपा १३ घरतर्फ आउनेक्रममा कौवाई खोलामा लगाइएको काठेपुलबाट मोटरसाईकल चिप्लिदा दुर्घटना भएको हो।

घाईतेलाई उपचारका लागि जिल्ला अस्पतालमा ल्याई प्रथामिक उपचारपछि विराटनगर पठाइएको छ। सर्वसाधरण आवतजावत गर्नका लागि बनाइएको काठेपुल पछिल्लो समय राजमार्गले तलबाट सडक बनाएपछि प्रयोग विहीन बनेको थियो। त्यही पुल प्रयोग गर्नेहरु वेलाबखत दुर्घटनामा पर्ने गरेका छन।