सप्तरी, ३ कात्तिक । सप्तरी सदरमुकाम राजविराजस्थित जिल्ला प्रहरी कार्यालयसँगै टाँसिएको एक घरमा महिलाको हत्या भएको छ । दशैंको टिकाको दिन प्रहरी कार्यालय नजिकै भएको उक्त घटनाले स्थानिय आश्चर्यचकित पर्नुका साथै प्रहरीलाई सुरक्षाको चुनौती थपिएको छ ।

राजविराज ६ स्थित जिल्ला प्रहरी कार्यालयको दक्षिणपट्टी टाँसिएको सो घरमा बस्दै आएकी ४२ वर्षिया आशा देवको अज्ञात ब्यक्तिवाट हत्या गरिएको प्रहरीले जनाएको छ । शुक्रवार विहान छिमेकीहरु घर जाँदा उनी ओछ्यानमै मृत भेटिएको प्रहरीको भनाई छ ।
देवको टाउको र आँखामा इटा र लोहोरोले प्रहार गरी हत्या भएको प्रारम्भिक अनुसन्धानले देखाएको प्रहरी निरिक्षक सुजाता तुम्वाहाम्फेले बताउँदै थप अनुसन्धान भईरहेको जानकारी दिइन् ।

यता हत्यामा प्रयोग गरिएका इटा र लोहोरो रगत लागेकै अवस्थामा घट्नास्थलमा फेला परेको छ । प्रहरीले देवको हत्या राती १२ बजेदेखि बजेसम्मकोबीचमा हुन सक्ने अनुमान गरेको छ । बिहान सबेरै उठने देव ८ वजेसम्म नउठेपछि छिमेकीले उनको कोठामा हेर्दा रगताम्मे अवस्थामा ओछ्यानमै उनको शव फेला पारेका थिए ।
१८ वर्षअघि पतिसँग सम्वन्ध विछेद गरेकी देवको सन्तान छैनन् । उनी घरमा एक्लै बस्दै आएकी थिईन ।

भतिज निरजका अनुसार आशाकी आमा दुर्गाको ७ दिनअघि मात्र निधन भएको थियो । देव वस्ने कोठा र आगनमा समेत रगतको टाटा देखिएकाले हत्यापुर्व आक्रमणकारीसँग निकै संघर्ष भएको हुन सक्ने र घटनामा एकभन्दा बढिको संलग्नता हुनसक्ने अनुमान गरिएको छ ।

देवको शव शुक्रवारै पोष्टमार्टमका लागि धरानस्थित विपी कोईराला स्वास्थ्य विज्ञान प्रतिष्ठान पठाईएको प्रहरीले जनाएको छ ।