काठमाडौं , १२ कात्तिक । चौंथो अन्तराष्ट्रिय वैकल्पिक उर्जासम्बन्धि सम्मेलन काठमाडौंमा सुरु भएको छ ।

सोमबार शिक्षा, विज्ञान तथा प्रविधि मन्त्री गिरिराजमणिले वैकल्पिक उर्जासम्बन्धि सो अन्तराष्ट्रिय सम्मेलनको काठमाडौंमा उद्घाटन गर्नु भएको हो । २० वटा देशका २ सय ५० भन्दा बढि विज्ञहरु सहभागी रहेको सो अन्तराष्ट्रिय सम्मेलनले वैकल्पिक उर्जा क्षेत्रको विकासका लागि आवश्यक ठोस रणनीति तय गर्ने विश्वास लिइएको छ ।

सम्मेलनको उद्घाटन गर्दै शिक्षा, विज्ञान तथा प्रविधि मन्त्री पोखरेलले वैकल्पिक उर्जाको भरपुर विकास गरेर उर्जा संकट समाधान गर्न नेपाल सरकार प्रतिवद्ध रहेको बताउनु भयो । उहाँले प्राकृतिक स्रोतको उपयोग गरेर नेपाललाई समृद्ध बनाउने योजना पनि स्मरण गराउनु भयो ।

कार्यक्रममा बोल्दै अर्थमन्त्री डा. युवराज खतिवडाले वैकल्पिक उर्जालाई नेपालले समृद्धिको महत्वपूर्ण आधारमा रुपमा लिएको स्पष्ट पार्नु भयो । उहाँले उर्जाको पर्याप्त उपयोग गरेर मुलुकलाई समृद्ध बनाउन सरकार लागि परेको पनि बताउनु भयो ।

कार्यक्रममा सहभागी वक्ताहरुले अतिकम विकसित राष्ट्रहरुको विकासमा वैकल्पिक उर्जाको आवश्यता र औचित्य झनै बढेर गएको धारणा राखेका थिए ।