संखुवासभा, ३० कात्तिक । संघीय सरकारका ऊर्जा, जलस्रोत तथा सिचाई मन्त्री बर्षमान पुनले १० वर्षमा १५ हजार मेघावाट विद्युत्त उत्पादन हुने बताएका छन । शुक्रबार संखुवासभाको तुम्लिङ्गटारमा आयोजित सभालाई सम्बोधन गर्दै सो कुरा बताएका हुन् ।

मन्त्री पुनले तीनवर्षमा तीन हजार मेघावाट, पाँच बर्षमा पाँच हजार मेघावाट र १० बर्षमा १५ हजार मेघावाट विद्युत्त नेपालकै खोलानालाबाट उत्पादन हुने दाबी गरेका हुन । उत्पादन भएको १५ हजार मेघावाट विद्युत्त मध्ये १० हजार मेघावाट विद्युत्त देश भित्रै खपत गर्ने वातावरण तयार गर्ने र त्यो भनेको दुई अंकको आर्थिक बृद्धि १० प्रतिशत हुने मन्त्री पुनको दाबी थियो ।

मन्त्री पुनले दृढताको साथ भने, अब मुलुक भित्रै ८ देखी १० हजार मेघावाट विद्युत्त खपत गर्ने वातावरण बनाउन लागी पर्ने र बाँकी रहेको ५ हजार मेघावाट विद्युत्त क्षेत्रीय बजार भारत तर्फ निर्यात गर्ने उनको भनाई छ ।

नेपालको बजार र कलकारखाना बढि भएको पाँच हजार विद्युत्त छिमेकी मुलुक भारत मात्रै नभएर उत्तरी छिमेकी राष्ट्र चीन र बंगलादेशमा समेत निर्यात गर्न सकिने मन्त्री पुनले बताए । नजिकका छिमेकी मुलुकहरु भारत, चीन र बंगलादेशसंग ऊर्जाको क्षेत्रमा सहकार्य गर्न सकिनेछ ।

यसरी विद्युत्तमा मुलुक आफै आत्मर्निभर भएपछि विद्युत्तको संञ्जाल अथवा नेपाललाई विद्युत्तको हब नै बनाउने सकिने समेत मन्त्री पुनको दाबी गरे ।
नेपाल सरकारले १९ वटा जलविद्युत्तहरुको प्रोजेक्ट अध्ययन गरिरहेको जानकारी दिदै नेपाल सरकार आफैले उत्पादन गर्ने योजना बनाएको समेत मन्त्री पुनले जानकारी दिए ।

त्यहि १९ वटा जलबिद्युत्त मध्येको संखुवासभाको अपर अरुण नेपाल सरकार आफैले बनाउने सरकारले निर्णय गरिसकेको र यसमा विश्व बैङ्कले लगानी गर्ने सहमती भएको समेत कार्यक्रममा जानकारी दिए ।

कार्यक्रममा ऊर्जा सचिव दिनेश घिमीरेले आयोजना निर्माण गर्न लागी प्रक्रिया शुरु भईसकेको जानकारी गराए । स्थानीयलाई धेरै भन्दा धेरै शेयर दिने तयारीमा लागेको उनको भनाई थियो ।

जोगवनी-विराटनगर-किमाथाङका (कोशी राजमार्ग) सडक अन्तर्गत भोटखोला गाउपालिकाको गोला र वरुण बजार नजिकै आयोजनाको बाँधस्थल बस्नेछ । यो आयोजना अहिले सम्म विश्वमै सस्तो रुपमा बन्ने आयोजना भएको बताइएको छ ।

शुक्रबार ऊर्जा, जलस्रोत तथा सिंचाइ मन्त्री वर्षमान पुन, अर्थ मन्त्री डा. युवराज खतिवडा, विश्व बैकका उपाध्यक्ष हाटविग साफेर, ऊर्जा सचिव दिनेश घिमीरे, कुलमान घिसिङ लगायतको टोली आयोजनास्थलको स्थलगत अध्ययन र अनुगमन गरेको हो ।

अपर अरुणबाट ७ सय मेगावाट भन्दा बढि विद्युत्त उत्पादन हुनेछ भने आयोजनामा ९० करोड अमेरिकी डलरको हाराहारीमा खर्च हुने अनुमान अनुमान गरिएको छ । आयोजना निर्माण स्थलमा नदीको वार्षिक बहाव दर उच्च रहेकोले ऊर्जा बढी प्राप्त हुने र उच्च हिमाली क्षेत्रमा रहेका कारण खेतीयोग्य जमिन, मानव वस्ती कम भएकाले वातावरणीय प्रभाव कम पर्ने समेत बताईएको छ ।

कार्यक्रममा अमेरिकाका लागी नेपालको राजदुत अर्जुन कार्की, प्रतिनिधी सभाका साँसद राजेन्द्र गौतम, राष्ट्रिय सभाका विधान ब्यबस्थापन समितिका सभापति पर्शुराममेघी गुरुङ, पूर्वस्वास्थ्य राज्यमन्त्री तारामान गुरुङ, जिल्लाका राजनैतिक दलका प्रतिनिधी लगायतले आ–आफ्ना भनाई राखेका थिए ।