बर्दिया,६ मंसिर । बर्दियामा बढैयाताल गाउँपालिका ३ गोव्रेपुरुका ३५ वर्षीय मोहन खटिकको हत्याको आरोपमा इलाका प्रहरी कार्यालय मैनापोखरले ३ जनालाई पक्राउ गरेको छ ।

हत्याको योजनाकारको आरोपमा बढैयाताल गाउँपालिका ३ गोब्रेपुरका लक्षु भनिने ४५ वर्षिय लक्षिराम खटिक, सतपतियाका ४५ वर्षिय शालिकराम खटिक र २५ वर्षिय राजेन्द्र खटिकलाई पक्राउ गरेको ईलाका प्रहरी कार्यालय मैनापोखरले जनाएको छ ।

इलाका प्रहरी कार्यालय मैनापोखरका प्रहरी निरीक्षक लक्ष्मण ओलीले प्रहरीलाई दिईएको बयान, कलडिटेल रेकर्ड, पीडितको किटानी जाहेरी घटना स्थलको सवुत प्रमाणको आधारमा उनीहरुलाई पक्राउ गरीएको बताए । उनीहरुलाई ईलाका प्रहरी कार्यालय मैनापोखरको टोलीले आज विहान पक्राउ गरी पत्रकार सम्मेलन गरी पक्राउ गरेको हो ।

मृतकी श्रीमती समरी खटिकले कात्तिक २२ गते दिएको जाहेरीका आधारमा मनोरथ भनिने मनोहर खटिक र राम जुगेस खटिकलाई पनि अनुसन्धानका क्रममा हिरासतमा राखिएको जनाएको छ ।

हत्याका मुख्य आरोपी भारतीय नागरीक भएको इलाका प्रहरी कायालयले जनाएको छ । ३२ र ३३ बर्षका दुइजना पेशेवार अपराधीको प्रयोग भएको अनुसन्धानबाट खुलेको छ । जिल्ला प्रहरी कार्यालयका प्रमुख एसपी सुरेन्द्र प्रसाद मैनालीले अर्को देशमा भएको कारणले सार्वजनिक नगरेको र अन्तरदेशिय प्रहरी सँग समन्वय गरेर अनुसन्धान गरीने बताए ।

पशु व्यापार गर्दै आएका मृतक खटिकलाई पुरानो रिसिईबी तथा लेनदेनका कारण गोली हानेको प्रारम्भिक अनुसन्धानबाट खुलेको प्रहरीले जनाएको छ ।

मृतक खटिकको घरमै सुतिरहेको बेलामा पेटमा गोली हानिएको थियो । घाईते अवस्थामा भेटिएका उनलाई परिवार लगाएत स्थानीयवासीले उपचारको क्रममा नेपालगञ्ज मेडिकल कलेज उपचारका लागि लगेका थिए ।