दुलेगौडा, ७ मंसिर । तनहुँको शुक्लागण्डकी–३ कवासेमा आज विहान पुरुषको शव फेला परेको छ । कवासेमा निर्माणाधिन घरको एक कोठामा करिव ५० वर्षका वृद्ध पुरुषको शव फेला परेको हो ।

शवको पहिचान हुन सकेको छैन् । शव हेर्दा हत्या गरिएको हुन सक्ने बताइएको छ । घरमा काम गर्न आएकी एक महिलाले शव देखि पछि प्रहरीलाई खबर गरेकी थिइन् ।

घट्नाबारे अनुसन्धान भइरहेको इलाका प्रहरी कार्यालय बेलचौताराका प्रमुख प्रहरी निरिक्षक श्रवण कुमार वि.कले जानकारी दिए । सोधपुछको लागि ५ जनालाई नियन्त्रणमा लिइएको उनले बताए ।

शव भएको स्थानबाट करिव २ सय मिटरमाथि बेसारेगौडो डाँडाँमा कपडा, चप्पल, बिस्कुट भेटिएको प्रहरीले जनाएको छ । सोहि स्थानबाट वृद्धलाई कवासेतर्फ ल्याएको बताइको छ । बाटोका विभिन्न स्थानमा रगत देखिएको छ । शवलाई छोपिएर राखिएको थियो भने अनुहारमा चोट लागेको छ । पोष्टमार्टको लागि शव जिल्ला अस्पताल दमौली लगिएको प्रहरी निरिक्षक वि.क.ले बताए ।