काठमाडौं । रसुवा जिल्लाको भोटेकोशी नदीमा आएको विनाशकारी बाढीबाट प्रभावित तथा घाइते नागरिकहरूको उद्धार कार्य आज बिहानैदेखि पुनः सुरु गरिएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार नेपाली सेना र निजी क्षेत्रका हेलिकप्टरमार्फत प्रभावित क्षेत्रमा रहेका घाइते तथा जोखिममा परेका नागरिकको उद्धार भइरहेको छ।

गएराति अबेरसम्म बसेको राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकले बाढी प्रभावित क्षेत्रका घाइतेलाई तत्काल उद्धार गरी सुरक्षित स्थानमा उपचारको व्यवस्था गर्ने निर्णय गरेको थियो।

गृह मन्त्रालयका प्रवक्ता आनन्द काफ्लेले प्रभावित क्षेत्रबाट उद्धार गरिएका घाइतेलाई रसुवाको धुन्चे र नुवाकोटको विदुरस्थित नेपाली सेनाको ब्यारेकमा स्थापना गरिएका उपचार तथा राहत क्याम्पमा पुर्‍याउने व्यवस्था मिलाइएको जानकारी दिए।

गम्भीर घाइतेलाई काठमाडौं ल्याइने

उद्धार गरिएका घाइतेको स्वास्थ्य अवस्थाका आधारमा प्राथमिकता निर्धारण गरिनेछ। गम्भीर अवस्थामा रहेका व्यक्तिलाई हेलिकप्टरमार्फत तत्काल काठमाडौं ल्याई थप उपचारको व्यवस्था गर्ने तयारी गरिएको छ।

बाढी प्रभावित क्षेत्रमा सञ्चार, सडक तथा अन्य पूर्वाधारमा व्यापक क्षति पुगेकाले हवाई उद्धारलाई प्राथमिकतामा राखिएको छ। नेपाली सेनाका साथै आवश्यकताअनुसार निजी क्षेत्रका हेलिकप्टरसमेत उद्धार कार्यमा परिचालन गरिएको प्राधिकरणले जनाएको छ।

राहत सामग्री विदुर पठाइयो

यसैबीच, बाढीबाट प्रभावित नागरिकका लागि आवश्यक खाद्यान्न, औषधि तथा अन्य राहत सामग्री स्थलमार्गबाट नुवाकोटको विदुरस्थित नेपाली सेनाको ब्यारेकतर्फ पठाइसकिएको छ।

त्यहाँबाट प्रभावित क्षेत्रको आवश्यकता र पहुँचका आधारमा राहत सामग्री वितरण गर्ने तयारी गरिएको छ। सरकारले खोजी, उद्धार, उपचार र राहत कार्यलाई एकसाथ अघि बढाउने गरी सुरक्षा निकाय, स्थानीय प्रशासन तथा विपद् व्यवस्थापनसँग सम्बन्धित निकायलाई उच्च सतर्कताका साथ परिचालन गरेको जनाएको छ।

Originally published on abcnews.com.np.