काठमाडौं,२० मङसिर । अख्तियार दुरुपयोग अनुसन्धान आयोगले चिनीको विषयमा अनुसन्धान थालेको छ । आयातमा परिमाणात्मक बन्देज लगाउने तथा मूल्य निर्धारणकाबारे संघीय संसदको सार्वजनिक लेखा समितिको निर्देशनका आधारमा आयोगले अनुसन्धान थालेको हो ।

अख्तियार दुरुपयोग अनुसन्धान आयोगका प्रवक्ता रामेश्वर दंगालले चिनीको उक्त विषयमा आयोगले अनुसन्धान अघि बढाइसकेको बताएका छन ।

चिनीमा कोटा तोक्ने सरकारको निर्णयले मूल्य बढाउन प्रत्यक्ष भूमिका खेलेको ठहरसहित लेखा समितिले यसमा संलग्न अधिकारीमाथि कारबाही अघि बढाउन निर्देशन दिएको थियो।उक्त विषयमाथि समितिले गत ५ गते नै अख्तियारलाई निर्देशनको पत्र पठाइसकेको छ।

गत २६ वैशाखमा चिनी उद्योगले उत्पादित मूल्य ९मूल्य अभिवृद्धि करबाहेक० ५३ रुपैयाँ प्रतिकिलोमा बिक्री गरेको उद्योग, वाणिज्य तथा आपूर्ति मन्त्रालयको अनुगमन प्रतिवेदनले देखाएको समितिको निर्णयमा उल्लेख गरिएको छ ।

त्यसको केही समयपश्चात नै चिनीको मूल्य प्रतिकिलो ७५ देखि ८० रुपैयाँ पुगेको थियो। त्यसयता गत २१ भदौमा प्रधानमन्त्री, मन्त्रीहरू, सांसदहरू, सरकारी पदाधिकारी, उखु किसान र चिनी उद्योग संघका प्रतिनिधिकाबीच चिनीको मूल्य प्रतिकिलो ६३ कायम गर्ने निर्णय भए पनि सो नगरी चलखेल गरिएको दावी समितिको छ।