सप्तरी,२८ मङसिर। सप्तरीको तिलाठी कोईलाठी गाउँपालिका ७ बभनगामा टोलमा शुक्रबार साँझ भएको भिषण आगलागीमा १० घर जलेर नष्ट भएको छ भने,करिब ४० लाख बराबरको क्षति भएको छ ।

गाउँपालिका ७ स्थित विन्देश्वरी साफीको घरबाट साझ ५ बजेतिर अचानक सल्किएको आगो फैलिएर निजको ३ घरका साथै छिमेकी प्रसाद साफीको २ घर, सकिलाल रजकको २ घर, प्रयोग रजकको २ घर र फुलिया देवी रजकको १ घर जलेर नष्ट भएको हो ।

सो आगलागीमा ४ पशु चौपाया जलेर मरेका छन भने ,छोरीको बिहेका लागी जम्मा गरेको फुलिया देवी रजकको घर सहित नगद ५० समेत जलेर नष्ट भएको छ । यता अन्य घरमा क्षति हुन नदिन छेउका फुसको संरचना भएका २ वटा घर भत्काइएको छ ।

राजविराज र हनुमाननगर कंकालिनी नगरपालिकाको बारुणयन्त्र तथा स्थानिय बासी र प्रहरीको मदतले एक घण्टाको प्रयास पछि आगोलाई नियन्त्रण गरिएको थियो ।

आगलागीमा लत्ताकपडा भाडाकुडा खाद्यान, फर्निचर र नगद समेत गरी ४० लाख बराबरको क्षति भएको तिलाठी कोईलाडी गाउँपालिकाका प्रमुख सतिश कुमार सिंहले जानकारी दिएका छन् ।

आगलागीको कारण भने खुल्न नसकेको र यस विषयमा आवश्यक अनुसन्धान भईरहेको जिल्ला प्रहरी कार्यालय सप्तरीले जनाएको छ ।