बुटवल,९ पुस । बुटवल उप महानगरपालिकाका वडासचिव घुससहित पक्राउ परेका छन् । अख्तियार दुरुपयोग अनुसन्धान आयोगको कार्यालय बुटवलको टोलीले वडानम्बर १३ का सचिव भरत काउचालाई सेवाग्राहीबाट ५ हजार घुस लिंदै गर्दा रंगेहात पक्राउ गरेको हो ।

बुटवल उप महानगरपालिका गेट अगाडिको एक रेष्टुरेन्टमा उनले रकम लिँदै गरेको अवस्थामा पक्राउ गरिएको अख्तियारले जानकारी दिएको छ ।

काउचाले पञ्जीकरण जन्म, मृत्यु, विवाह, सम्बन्धविच्छेद र बसाइँ सराइ जस्ता व्यक्तिगत घटनाको दर्तामा सेवाग्राहीसँग घुस लिएको बताइएको छ । काउचाले घुस लिने गरेको गुनासो अख्तियारसम्म पुगेपछि उनी पक्राउ परेका हुन् ।

एक दशकदेखि बुटवल उपमाहनगरपालिका विभिन्न शाखामा बसेर काम गरेका काउचा पछिल्लो समय वडानम्बर १३ को सचिवका रुपमा कार्यरत थिए ।

अख्तियारको टोलीले काउचालाई पक्राउ गरी उनको पसल सिल गर्न लागेको प्रहरीले जनाएको छ । काउचाको बुटवल हाटबजारमा पसलसमेत रहेको छ ।