शवको खोजी तथा उद्धारका लागि नेपाल प्रहरी, सशस्त्र प्रहरी बल र नेपाली सेनाका करिब एक हजार सुरक्षाकर्मी परिचालन गरिएको छ। उनीहरूसँगै स्थानीय युवा, विभिन्न राजनीतिक दल तथा संघसंस्थाका प्रतिनिधिसमेत बिहानैदेखि शव खोजीमा खटिएका छन्।

शव व्यवस्थापनमा चुनौती

ठूलो संख्यामा शव भेटिएपछि व्यवस्थापनमा कठिनाइ भएको प्रशासनले जनाएको छ। शव राख्न औद्योगिक प्रतिष्ठानको सरकारी भवनमा आवश्यक तापक्रम मिलाउने व्यवस्था गरिएको छ।

बाढीले बगाएर ल्याएका अधिकांश शव पहिचान गर्न कठिन हुने अवस्थामा रहेकाले भरतपुर अस्पतालको शवगृहमा लगेर अनुहार सफा गरी पहिचानयोग्य बनाउने प्रयास भइरहेको छ। त्यसपछि शवको तस्बिर खिचेर नम्बर राखी व्यवस्थापन कक्षमा राखिनेछ।

तस्बिरमार्फत पहिचान गरिने

एसपी पौडेलका अनुसार आफन्तहरू शव पहिचानका लागि आए पनि सबै शव प्रत्यक्ष देखाउन सम्भव नहुने अवस्था छ। त्यसैले अनुहार सफा गरेर खिचिएका शवका तस्बिर देखाएर पहिचान गर्ने व्यवस्था मिलाइएको छ।

हराइरहेका व्यक्तिका आफन्तसँग समन्वय गर्न प्रशासनले छुट्टै डेस्कसमेत स्थापना गरेको छ।

आफन्तलाई निःशुल्क खाना र बसोबास

हराइरहेका आफन्तको खोजीमा चितवन आउने व्यक्तिका लागि चितवन होटल संघले निःशुल्क खाना र बसोबासको व्यवस्था गर्ने भएको छ। जिल्ला प्रशासनसँग समन्वय गरी होटल व्यवसायीले प्रभावित परिवारका सदस्यलाई आवश्यक सुविधा उपलब्ध गराउने निर्णय गरेका हुन्।

नारायणी नदीमा शव खोजी कार्य जारी रहेको र सुरक्षा निकायसँगै स्थानीयवासीसमेत सक्रिय रूपमा परिचालित रहेको एसपी पौडेलले बताउनुभएको छ।