काठमाडौं,१३ माघ । प्रमुख प्रतिपक्ष दल नेपाली कांग्रेसले ‘नागरिकता छानबिन गर्न आयोग गठन गर्न कानुनी व्यवस्था गर्ने’ सरकारको प्रस्ताव अस्विकार गरिदिएको छ ।

कांग्रेसका सांसद भरतकुमार शाहले नागरिकता छानबिन गर्न आयोग गठन गर्न कानुनी व्यवस्था गर्ने सरकारको प्रस्ताव स्विकार्य नहुने अडान राखेको हो ।

आइतबार संघीय संसदको राज्य व्यवस्था तथा सुशासन समितिको बैठकमा ‘नेपाल नागरिकता ऐन, २०६३ लाई संशोधन गर्न बनेको विधेयक’माथिको छलफलमा भाग लिँदै उनले जन्मको आधारमा नागरिकता लिएकाहरुको छानबिन गर्न आयोग गठन गर्ने प्रावधान राखिएकोमा आपत्ति जनाएका छन ।

सांसद शाहले नागरिकतासम्बन्धी विषयमा छानबिन गर्न आयोग गठन गर्ने अधिकार सरकारलाई रहेको उल्लेख गर्दै त्यसलाई कानुनमै उल्लेख गर्न भने आवश्यक नरहेको तर्क गरे ।

उनले सरकारले आफूसँग अधिकार हुँदाहुँदै पनि नागरिकता छानबिनका लागि आयोग गठन गर्ने कानुनी प्रावधान राख्न खोजेकाले त्यसलाई स्विकार गर्न नसकिने स्पष्ट पारे ।

समितिका अर्का सदस्य एवम् राष्ट्रिय जनता पार्टी, नेपालका सांसद लक्ष्मणलाल कर्णले सरकारले नागरिकता छानवीनको विषयमा आयोग गठन गर्ने कानुनी व्यवस्था गर्ने प्रस्ताव ल्याएकोमा आपत्ति जनाए । उनले सरकारलाई विदेशी नागरिकसँग विवाह नै नगर्ने प्रस्ताव ल्याउन चेतावनीा दिए ।

विधेयकमा नागरिकता छानवीनका लागि आयोगनै गठन गर्ने प्रावधान राखिएको छ । तर त्यसप्रति प्रमुख प्रतिपक्ष दल कांग्रेसको आपत्ति छ ।