काठमाडौं, २६ माघ । सभामुख कृष्णबहादुर महराले सवारी दुर्घटनामा परी घाइते भएका ५ नं. प्रदेश सभा सदस्य उत्तर कुमार ओलीको स्वास्थ्य अवस्थाबारे जानकारी लिएका छन ।

सभामुख महराले शनिबार बिहान मेडिसिटी हस्टिपल पुगी प्रदेश सांसद
ओलीको स्वास्थ्य अवस्थाका बारेमा जानकारी लिएका हुन । घाइते सांसद उपचारमा संलग्न डाक्टरहरुले सांसद ओलीलाई धेरै चोट लागेको भए पनि खतरामुक्त रहेको र आइसियूमा राखेर उपचार भइरहेको सभामुख महरालाई जानकारी गराएका थिए ।

भेटमा सभामुख महराले सांसद ओलीको उपचारमा कुनै कमी हुन नदिन अस्पताल प्रशासनलाई आग्रह गरे । साथै परिवार र आफन्तहरुलाई नआत्तिन समेत आग्रह गरेका थिए ।

सभामुख महरासँगै घाइते सांसद ओलीलाई भेट्न नेकपा संसदीय दलका सचेतक तथा प्रतिनिधि सभाका सदस्य शान्ता चौधरी पनि मेडिसिटी हस्पिटल पुगेका थिए ।

दाङ क्षेत्र नं. ३ ख बाट निर्वाचित प्रदेश सांसद वली बिहीबार बेलुकी घोराही–लमही सडकखण्डमा सवारी दुर्घटनामा परेका थिए । उनको अहिले मेडिसिटी हस्पिटलको आइसियूमा राखेर उपचार भइरहेको छ ।