काठमाडौं, २ फागुन। प्रधानमन्त्री केपी शर्मा ओलीले राष्ट निर्माणको जिम्मेवारी दिएकोमा आभार व्यक्त गरे ।

देशवासीका नाममा सम्बोधन गर्दै उहाँले सरकारको पहिलो वर्ष समृद्धिको आधार तयार पार्न लागेको भन्दै राज्यको संरचनागत व्यवस्थापनमा समय खर्च भएको बताए ।

निकै कठिन मोडमा सत्ता सम्हालेको स्मरण गर्दै उनले त्यसलाई पनि सहजताका साथ अंगालेर काम गरिरहेको बताए।

प्रधानमन्त्री ओलीले सरकार लोकतन्त्रप्रति प्रतिवद्ध रहेको भन्दै कसैले अधिनायकवाद भनेर प्रचार गर्दै हिँड्नुलाई ध्यान बराल्ने काम बाहेक केही नभएको बताए ।
साथै आज बिहान उद्घाटन गरिएको पानी जहाज कार्यालय रमाइलोको लागि मात्रै नभएको बताए। पानी जहाज आउँदैन कि भन्नेहरुलाई केही महिना पर्खेपछि पानी जहाज सञ्चालनमा आउने र टिकट पाइने समेत बताए । प्रधानमन्त्री ओलीले आफूले पहिलो पटक प्रधानमन्त्री भएको बेला भारतसँग छलफल गरेको नेपालमा पानी जहाज चलाउने योजनाले अब साकार रुप लिन लागेको पनि स्पष्ट पारे ।

आफूले नेतृत्व सम्हालेको एक वर्ष भएको अवसरमा नागरिकका नाममा सम्बोधन गर्दै प्रधानमन्त्री ओलीले देश समृद्धिको बाटोमा हिँडिसकेको बताए ।
परराष्ट्र सम्बन्धमा सुधार आएको बताउँदै उहाँले केही नयाँ देशसँग पनि सम्बन्ध विस्तार भएको बताए ।