काठमाडौ,२२ फागुन । अर्थमन्त्री डा. युवराज खतिवडाले दीर्घकालीन प्रकृतिका विकास आयोजनाहरुमा लगानी गर्न बैंक तथा वित्तिय संस्थाहरुलाई आग्रह गर्नु भएको छ ।

अर्थमन्त्री खतिवडाले व्यवसायिक क्षेत्रको लगानीमा देखिएको अभाव हटाउन पनि बैंक तथा वित्तिय संस्थाहरुले दीर्घकालीन प्रकृतिका विकास आयोजनाहरुमा लगानी गर्नुपर्ने आवश्यक्ता पनि औंल्याउनु भयो ।

बुधबार काठमाडौंमा नेपाल पूर्वाधार बैंक लिमिटेडको उद्घाटन गर्दै उहाँले मुलुकमा दीर्घकालीन प्रकृतिको विकास आयोजनाका लागि पूँजी र जनशक्ति दुवै आवश्यक रहेको उल्लेख गर्दै त्यो अभाव पूर्ति गर्ने दिशामा अघि बढन पनि बैंक तथा वित्तिय संस्थाहरुलाई सचेत गराउनु भयो ।

अर्थमन्त्री खतिवडाले बैंक तथा वित्तिय संस्थाहरुले छिटो मुनाफा लिने होडमा मात्रै ध्यान केन्द्रित गर्न नहुने पनि स्मरण गराउनु भयो । ४० अरव अधिकृत पूँजी र २० अरव जारी पूँजीमा स्थापना गरिएको सो बैंकले ४० प्रतिशत सेयर सर्वसाधारणका लागि जारी गरेको छ ।

बैंकका अध्यक्ष अनुज अग्रवालले पूर्वाधार विकासमार्फत् सरकारसँग सामाजिक तथा आर्थिक विकासमा सहकार्य गरी लगानीकर्ताहरुलाई सामाजिक लाभांश समेत प्रदान गर्ने लक्ष्य लिइएको पनि बताउनु भयो ।